"18+ сөздің өзінен ұялатынмын": актриса Бақытгүл Серікбаева кинодағы ашық сахналары туралы айтты

Актриса Бақытгүл Серікбаева отандық фильмдер арқылы көпшілікке кеңінен таныс. Өнер иесі "Мамский әңгіме" бағдарламасында "Қашан туасың?" киносындағы ашық сахналары туралы айтты, деп жазады KAZ.NUR.KZ.

"Киноға кастинг директоры шақырды. Сосын кетіп қалдым. Кейін маған хабарласып, "Ашық сахналар бар" деді. "Қаншалықты ашық сахна?" деймін ғой. "Қазір саған сценарий жіберемін" деді. Оқып болдым да, "Мен түсе алмаймын. Кешір мені" дедім.

Сөйтіп Айдын аға аудиожазба жіберді. Осыған дейін ол кісімен "Досмұқасан" фильмінде жұмыс істеген болатынбыз. "Бақытгүл, кино сен ойлағандай түсірілмейді. Жазылғандай түсірілмейді. Ол өте эстетикалық тұрғыдан болады. Сондықтан уайымдама. Қорықпа! Сен!" деді. Сонда да мен ойландым. Қорқыныш басым болды. Ондай сахнаға түспегенмін. "Жарайды" деп келісім бердім. Таң атқанша уайымдап, ұйықтай алмайтынмын. Сол сахналар ғана мені уайымдатты. Қорқыныш кейін келе пайда болды. Тәрбиеден бе, түсініктен бе, қатты уайымдадым. Ашық сахна түгілі, +18 сөздің өзінен ұялатынмын. Осындай тақырыптағы бірінші жобам болғасын, әйел адамның мәселесін, тағдырын көрсету қосылғасын, көзім бақырайып, қатты уайымдадым", - деді Бақытгүл Серікбаева.

Еске сала кетейік, осыған дейін Бақытгүл Серікбаева жан сырын ақтарған болатын.