"Құлаған сәтте менсінбеушілік танытты": Нұржан Қалжан өнердегі достарына ренішін айтты (видео)

Сахнадан біршама уақыт жоғалып кеткен Нұржан Қалжан шығармашылығы жайлы сыр шертті. Ерекше даусымен көпшіліктің көзайымына айналған ол "Хабарlike" бағдарламасында өнерге оралудың қиын тұстарын айтты.

Сұқбат барысында Нұржан Қалжан өнерден көңілі қалған сәттерін де еске алды.

"10 жылда мен құрылысқа немесе басқа жұмысқа кеттім дей алмаймын. Өнердің бір шетінде жүрдім. Ортасына түскен жоқпын, оны мойындаймын. Сахнаға шықпадым, түсірілімдерге қатыспадым. Тек тойдың маңында жүрдім.

Әнші сахнадан қанша алыстап кетсе де, оның тыңдарманы жібермейді екен. Бір кездері ауылға қайтып, мал бағамын деген ойлар келді. Өйткені өнерден көңілім қалғандай болды. "Кетемін" деп ауылға қайтқанның өзінде жатқызбады. Тыңдармандарым тойларына, қуаныштарына шақырып алды. Содан тойға барып, ақша тауып жүрдім", - деді ол.

Осы тұста әнші өнерге оралудың неліктен қиын болғанын түсіндірді.

"Өнерге оралу өте қиын. Қазақта "көзден кеттің, көңілден кеттің" деген сөз бар. Тіпті, қасыңдағы өнер адамдарының өзі сенің қайта шықпауыңа әрекет жасайды. Мысалы мен биіктікті де көрдім. Әнім танымал болып, күнде қуанышқа, күнде мейрамға барғанда қасымда өнердегі 10-20 досым жүрді.

Төменге құлаған сәтім де болды. Ол жақтың да, бұл жақтың да дәмін көрдім. Құлаған шағымда жаңағы достардың бірі де қалмады. Ол өмірдің заңдылығы да шығар. Бірақ сол өнердегі достарым мені көріп қалса, менсінбеушілікпен қарай бастады", -деді Нұржан Қалжан.