"Сот-медициналық сараптама жасалды": ұшақта жарақат алған Ләйлә Сұлтанқызы жағдайын айтты

Ұшақ бортында жарақат алып, Fly Arystan әуекомпаниясының үстінен арыз түсірген Ләйлә Сұлтанқызы қазіргі жағдайын айтты. Тележүргізуші сот-медициналық сараптама жасалғанын хабарлады, деп жазады KAZ.NUR.KZ.

Ләйлә Сұлтанқызы өзі үшін алаңдаған оқырмандарымен Instagram-дағы парақшасы арқылы байланысқа шығып, қазіргі жағдайын айтты. БАҚ өкілі сот-медициналық сараптама жасалғанын хабарлап, әуекомпания тарапынан кері байланыс болмағанын жеткізді.

"Жаңа ғана қабылдаудан шықтым. Сот-медициналық сараптама жасалды. Жарақатымды қарады. Денедегі барлық жарақаттарды қарайды екен. Шамамен 20 күннің ішінде қорытынды дайын болады. Оны менен арыз алған тергеушіге береді. Сіздердің жазып жатқан пікірлеріңізді оқыдым. Мыңнан аса адам жазды. Көбі бұл компаниядан кәдімгідей зардап шегіпті. Енді дұрыс коммуникация орнату үшін сұрақтарыңызға жауап берейін. Соттасасыз ба? Қандай жоспарыңыз бар? деген сияқты сұрақтар келіп жатыр. Әзірге маған ешкім хабарласқан жоқ. Нәтижесі шықсын. Қалай болатынын айтып отырамын", - деді тележүргізуші.

Ләйлә Сұлтанқызы жарақатына қарамастан жоспарланған түсірілімдеріне қатысуға мәжбүр екенін айтып, боянып жатқан видеосын жариялады. Онда БАҚ өкілі бет әрлеушіге жарақат алған жері ауырып тұрғанын айтады.

"Көгерсе де, сырылса да, жырылса да жоспарланған түсірілімнен қалуға болмайды", - деген жазба қалдырды ол.

Сонымен қатар тележүргізуші кейін әуекомпания өкілдері байланысқа шыққанын жеткізді. Олар Ләйлә Сұлтанқызына қатысты жағдай бойынша ішкі тексеріс жүріп жатқанын хабарлаған.

"Сәлеметсіз бе, жағдайды орын алғаны өкінішті. Болған жағдай бойынша ішкі тексеріс жүргізудеміз. Ақпаратты анықтап болған соң, сізге жауаппен оралатын боламыз. Күтуіңізді сұраймын", - делінген хабарламада.

Айта кетейік, бұған дейін тележүргізуші Ләйлә Сұлтанқызы денсаулығына зиян келтіргені үшін Fly Arystan әуекомпаниясының үстінен арыз түсіргенін хабарлаған болатынбыз. Ол ұшақ бортында үстіне ауыр зат істіне құлап, жарақат алғанын айтты.

Әуекомпания өкілдері болған оқыс оқиғаға пікір білдірді. Олар тележүргізуші дәрігерлерді күтуден бас тартып, ұшақтан шығып кеткенін мәлімдеді.