"Тауасар мен Қайсар түскен": "Көке" фильмінің авторлары Қызық Times бағдарламасына қонаққа барды

Айгүл Иманбаеваның ұлы Асылжан Абумуталиб өзі түсірген "Көке" фильмінің басты рөліне анасын алмаған. Әнші, актриса бұл туралы Қызық Times бағдарламасына келгенде айтты, деп хабарлайды KAZ.NUR.KZ тілшісі.

"Ұлыма өкпем қара қазандай, жалпы. Баланы туасың, өсіресің. Тұлға боп, режиссер боп қалыптасады. Сосын "мама, саған әлі де киноға пісу керек. Саған бұл кинода эпизодтық рөл берем. Ренжіме" дегенде қайтесің?" - деді ол.

Алайда Иманбаева фильмнің продюсері болып, туындыға қаржы табу жұмысымен айналысқанын айтты. Фильмде Тұңғышбай Жаманқұлов пен Дулыға Ақмолда секілді актерлар ойнайды. Сонымен қатар актерлік құрамда TikTok желісінде танымал Қайсар Хамза мен оның Намибияда кездестірген досы Тауасар бар. Намибиялық азамат Тауасар Қазақстанға фильмге түсу үшін арнайы шақырылған. Бұл оның елге алғаш келуі. Ол бәрі ұнағанын, жоба жаңа тәжірибе беріп жатқанын айтты. Тауасар блогер Қайсармен кездейсоқ танысқан. Олар бағдарлама студиясына көлікпен кіріп келді.

"Намибияға алғаш барған күні қарнымыз ашып, тауық жеуге барғанбыз. Сол жақта адамдарды әрі-бері таситын таксистер бар екен. Сол жақта танысып, Тауасар және Файзолла деген жігіт бізге әр жақта не барын түсіндіріп жүрді", - деді Қайсар Хамза.

Фильм режиссері Асылжан Абумуталибке TikTok жұлдыздарын киноға түсіруді әйелі ұсыныпты.

"Киноның ішінде Тұңғышбай аға көкені ойнайды. Ал Дулыға Ақмолда аға сол көкенің арқасында жүрген әкім. Ал Қайсар мен Тауасар сюжет бойынша, жемқорлыққа қарсы қызметте жұмыс істейді", - деп түсіндірді режиссер.

Бағдарлама барысында жүргізушілер Айгүл Иманбаеваның жақында тұрмыс құрғанымен құттықтады. Әнші тойдың қашан және қайда болатынын айтты.

"Тойға ұжымды түгел шақырамын. Ол ақпан айында Майамиде болады. Жолдасымның аты – Ерлан", - деді әнші.

Бағдарлама қонақтары ойын ойнап, көрермендері "Көке" фильмін көруге шақырды. Режиссердің сөзінше, кинода жемқорлық мәселесі көтеріледі. Туынды 5 қыркүйектен бері Қазақстанның барлық кинотеатрларында көрсетіліп жатыр.