"Анаң ғана соңына дейін барады": Жахан Отарғалиев қарт әйелге көмектесті (видео)

Қазақстандық танымал актер Жахан Отарғалиев игі іс істеп, көшеде сауда жасап тұрған бейтаныс қарт әйелге көмектесті. Өнер иесі оқырмандарын күн суықта баласы үшін далада тұрған анаға көмек қолын созуға шақырды, деп жазады KAZ.NUR.KZ.

Жахан Отарғалиев Астанада мешіттің алдында печенье сатып тұрған қарт әйелге тап болып, бірден оған көмек қолын созуды шешкен. Актер баласы үшін күн суықта сауда жасап тұрған ананың тауарын толығымен сатып алған.

Оған қоса өнер иесі оны арнайы видеоға түсіріп, Instagram-дағы парақшасы арқылы көпшілікті көмектесуге шақырды. Ол оқырмандарын игі істеп, ананың саудасын барынша жүргізуге қол үшін тигізуге үндеді.

"Әрқашан кішкентай болсада жақсылық жасап, жақсылық жасауға тырысайықшы. Жанашыр достар, апамды көріп жылағым келіп кетті. Дала суық, бала үшін ғой дейді. Сен үшін соңына дейін анан ғана болады дегеннің тағыда бір дәлелі. Аналарымыз аман болсын. Астаналық жанашыр достар, апам "Нұр- Астана" мешітінің жанында жиі боламын" дейді. Көріп танысаңыз, көмектесіп кетіңіз", - деп жазды Отарғалиев.