Шөкеев Арыс тұрғындарының қашан үйлеріне орала алатынын мәлімдеді
Жарияланған күні:
Түркістан облысы Ақжол ауылы Жамбыл атындағы орта мектепте облыс әкімі Өмірзақ Шөкеевтің қатысуымен баспасөз-мәслихаты өткізіліп, өңір басшысы тұрғындар апта соңында үйлеріне оралатынын жеткізді деп хабарлайды Отырар арнасы.
![Шөкеев Арыс тұрғындары апта соңында үйлеріне оралатынын мәлімдеді Шөкеев Арыс тұрғындары апта соңында үйлеріне оралатынын мәлімдеді](https://cdn.nur.kz/images/1120/3a62df077be01d41.jpeg)
Жиынға облыс әкімімен қатар "Nur Otan" партиясы Төрағасының бірінші орынбасары Мәулен Әшімбаев, қорғаныс министрінің орынбасары Бақыт Құрманбаев, ТЖД өкілі, Қазақстанның Бас санитар-дәрігері Жандарбек Бекшин, облыс прокуроры, аймақтық ветеринарлық инспеция өкілі қатысты.
Өңір басшысы елді мазалаған өткір әрі өзекті сұрақтарға жауап беріп, Арыстағы жағдай тұрақталып, қауіптің беті сейілгенін мәлімдеді.
"Арыс қаласына тұрғындарды апта соңында кіргізетін боламыз. Уақытын нақты 28 маусым күні хабарлаймыз. Себебі халықтың қауіпсіздігі үшін қаланы әлі де толық тазартуымыз қажет. Тұрғындарды қалаға кіргізу үшін Арыс қаласы 17 секторға бөлінді. Осы секторларға облысымыздың 16 ауданынан 640 жауапты (1 аудан – 40 адам) азамат бекітілді.
Тұрғындар үйіне оралған соң тұрғын-жайларына келтірілген шығындар бойынша бекітілген қызметкерлер фото-видеофиксация жасайды. Осы материалдар келтірілген шығындарды есептеуге көмек береді.
Тұрғындарды үйлеріне орналастыру үшін облыстық полиция қызметкерлері мен дәрігерлер, төтенше жағдай департаменті мен құзырлы мекемелер үздіксіз қызмет көрсетеді. Арыс қаласы толық қалпына келеді. Алаңдайтын ештеңе жоқ. Мемлекет тарапынан арыстықтарға қолдау көрсетіледі. Бұл қиындықты да бірге еңсере аламыз", –деді Шөкеев.
Сондай-ақ Арысқа арнайы келген "Nur Otan" партиясы төрағасының бірінші орынбасары Мәулен Әшімбаев апатқа қатысты өз ойын білдіріп, республика бойынша ашылған гуманитаралық көмек туралы айтты.
"Бүгінгі таңда 9 облыстан гуманитарлық көмек жеткізілді. Барлық облыстарда Арыс қаласына көмек беру бөлімдері ашылды. Бұл – қазақстандықтардың арыстықтарға көрсетіліп жатқан қайырымдылық шарасы. Алдағы уақытта құрылыс материалдарын жеткізуге мұрындық боламыз", – деді Әшімбаев.
Арыстағы төтенше жағдайдың шығыны мен зардабын жою үшін облыс әкімдігі тарапынан арнайы қор құрылды. Қазірдің өзінде бұл қорға 200 млн теңгеден астам қаржы жиналып үлгерді.
Өңірлерден гуманитарлық көмектер де жеткізіліп жатыр. Алдағы уақытта шығындар көлемі анықталған соң нысандарды қалпына келтіру жұмыстары басталады.
Еске сала кетейік, Қорғаныс министрінің орынбасары Бақыт Құрманбаев Арыстағы өрттің толығымен ауыздықталғанын хабарлаған еді.
Мақаланың түпнұсқасы: https://kaz.nur.kz/society/1801832-skeev-arys-trgyndaryny-kasan-jlerine-orala-alatynyn-mlimdedi/