Алматыдағы "Көк базар" карантин уақытында қалай жұмыс істеп тұр (фото)

Оңтүстік астанадағы ірі сауда орындарының бірі саналатын "Көк базар" карантин уақытысында өз жұмысын жалғастырып жатыр. Алайда, базарда киім-кешек пен үйге қажетті түрлі заттар сататын нүктелер толығымен жабылып, тек азық-түлік дүкендері мен орталық аумағындағы дәріханалар ғана ашық тұр. KAZ.NUR.KZ тілшілері әдетте адамдарға лық толы болған базардың бүгінгі жай-күйін көріп қайтты.

Карантинге жабылған Алматының ірі базарында бүгінгі күні адам көп емес. Бірақ, азық-түлік алуға келушілер азда болса бар. Жергілікті сатушылардың сөзінше, қала тұрғындары көбіне ет, сүт тағамдары мен картопты көптеп сатып алады.

Саудагерлер күнделікті кешкі алтыға дейін жұмыс істейтін болып шықты. Бірақ, кейбірі нүктесін сағат бес шамасында жауып кете береді. Оған қоса, карантин кезінде жұмысқа шығудан бас тартқандар да бар. Оған босап қалған орындар дәлел болмақ.

Базар аумағындағы сатушылар да, тұтынушылар да маска мен қолғаппен жүр. Саудагерлерлің айтуынша, алматылықтар қағаз ақшамен төлемейтін болып кеткен. Тұрғындардың басым көпшілігі карта арқылы немесе аударым жасап төлеуге көшкен.

Алайда, сатушылар сауда бұрынғыдай жүрмей тұрғанын мойындады. Олар оған көпшіліктің базардан гөрі супермаркеттерге көбірек сенім артуы себеп болса керек деп ойлайды. Бірақ, сауда саласындағылар "Көк базар" аумағында қажетті дизенфекция жұмыстары күнделікті жасалынып, сақтық шаралары барынша сақталатынын жеткізді.

Ең қызығы, базар аумағындағы қызметкерлердің айтуынша азық-түлікпен қатар, халық соңғы кезде адыраспанды көптеп сатып алуда. Ислам дініндегі азаматтар вируспен күресу мақсатында үйін адыраспан аластайтын болып шыққан. Сатушылардың сөзінше, олар коронавируске қарсы барлық шараларды жасап көрмек.

Ең маңызды әрі қызықты жаңалықтарды біздің Telegram арнамыздан оқыңыздар!