Ақмола облысында үш жігіт жоғалып кетті: екеуінің денесі табылды

Үш дос Ақмола облысының Астрахан ауданындағы Баршын көліне балық аулауға кетіп, жоғалып кетті. Екеуінің денесі табылған, үшінші адамды іздеу жалғасуда. Бұл туралы Төтенше жағдайлар министрлігі мәлімдеді деп хабарлайды KAZ.NUR.KZ.

Төтенше жағдайлар министрлігінің ресми өкілі Талғат Уәлидің айтуынша, үш дос көлге балық аулауға барып, жоғалып кеткен.

Іздеу жұмыстарының жалғасып жатқанына бес күн болды. Оқиға болған жерден аударылған темір қайық табылды. Ол жағалаудан 1 км қашықтықтағы қамыста жатқан.

Жедел-іздестіру шаралары барысында екі ер адамның мәйіті табылды. Олардың бірі 39 жаста, екіншісі 44 жаста болған. 42 жастағы үшінші адамды іздеу жалғасып жатыр.

Мамандар барлық сақтық шараларын сақтай отырып, балық аулауға кеңес береді. Қайықтар жарамды болуы керек, сонымен қатар жеке өмірді құтқару құралдары болуы қажет.

Еске салсақ, Маңғыстау облысында ер адам Каспий теңізінде інісімен бірге балық аулауға барған, бірақ бір сәтте қайық суға батып кеткен. Мәйітті судан шығарып алу үшін бір күн қажет болды.

Марқұмның ағасы олардың теңізге балық аулауға шыққандарын айтты. Алайда, қайықта тесік пайда болып, ол батып кетіпті. Құтқару операциясына құтқарушылар, полиция қызметкерлері және әскери қызметкерлер қатысты.

Оған қоса, Қарағанды облысында құтқарушылар мен сарбаздар көлікпен бірге суға батқан әйел мен жасөспірім қызды құтқарып қалған болатын. Суға батып кетуге шақ қалған автокөлік рөлінде 42 жастағы келіншек отырған. Оның қасында 16 жастағы қыз болған.