Шетелдіктер Қазақстанда қаржылық пирамида ұйымдастырған (видео)

Шетелдіктер Қазақстанның 5 қаласында заңсыз пирамида схемаларын іске асырған. Бұл туралы қаржы министрлігі қаржы мониторингі комитетінің баспасөз қызметі мәлімдеді деп хабарлайды KAZ.NUR.KZ.

Экономикалық тергеу департаментінің қызметкерлері Ақтөбе облысы бойынша қаржы пирамидасын ұйымдастыру фактісін анықтады.

Іс бойынша айыпталушылар өзін "Unique Finance" шетелдік фирмасының өкілдері ретінде таныстырып, адамдарға Pepsi, Nike, Microsoft, Ford, BMW сияқты танымал халықаралық компаниялардың құнды қағаздарына ақша салуды ұсынғаны анықталды.

Инвесторларға ай сайынғы инвестиция жалпы соманың 6 пайызы мөлшерінде, сондай-ақ жаңа серіктес салымының тағы 5 пайызы мөлшерінде пайда алуға уәде етілген. Компанияға ең төменгі жарна 1000 долларды құрады (427 мың теңгеден астам).

Алайда, іс жүзінде пирамиданы ұйымдастырушылар оның орнына танымал компаниялардың жалған акцияларын бере отырып, клиенттердің қаражатын иемденіпті.

Заңсыз әрекеттер Алматы, Нұр-Сұлтан, Шымкент, Ақтөбе және Оралда жүзеге асқан.

Қылмыстық кодексінің 217-бабының 2-бөлігі бойынша тергеу жүріп жатыр.

Ақшаларын "Unique finance"-қа салған қазақстандықтарды құзырлы органдарға арызбен жүгінуге шақырды.

Еске салсақ, Алматыда "B2B Jewelry" қаржы пирамидасын ұйымдастырушыларға қатысты тергеу жалғасып жатқаны туралы жазған едік. Қылмыстық іс материалдарына сәйкес, күдікті алаяқтар өз құрбандарына сатып алу сомасының 104%-ын қайтарып беру кепілдігімен зергерлік бұйымдарды ұсынған.

Айта кеткен жөн, Павлодар облысы бойынша Экономикалық тергеу департаменті қызметкерлері еліміздің 14 аймағы мен 17 қаласында филиалы бар қаржы пирамидасы қызметінің жолын кескенін хабарлаған едік.