Елордада коронавируспен күресу үшін қандай шаралар қабылдануда
Жарияланған күні:
![Дәрігерлер Дәрігерлер](https://cdn.nur.kz/images/1120x630/f173f26278de71a6.jpeg)
Елорда әкімінің орынбасары Бақтияр Мәкен қаланың қоғамдық кеңесінің отырысында коронавирус пандемиясымен күресу бойынша қабылданып жатқан шаралар туралы түсіндіріп берді деп жазады Нұр-Сұлтан әкімдігінің ресми сайты.
2020 жылдың басында елордада тек 1 ПТР-зертхана жұмыс істесе, қазіргі кезде 17 зертхана бар. Сонымен қатар, талдау нәтижелерін күту уақыты бастапқыдай бірнеше күнді емес 4 сағатты алады.
Елордаға 6 қазаннан бастап, бортында 59 026 жолаушысы бар 457 рейс қонды. Олардың шамамен 10 мың жолаушысы карантиндік стационарға жатқызылды. 74 жолаушыдан коронавирус анықталды, оларға қажетті медициналық көмек көрсетілді.
Карантиндік шектеулердің сақталуын бақылау мақсатында қалада 9 мобильді топ құрылып, 5 мыңнан астам нысан тексерілді. Карантинді бұзушылар жауапкершілікке тартылады.
Жедел медициналық жәрдем станциясының базасында call-орталық жұмысын жалғастыруда. Онда қала тұрғындары КВИ бойынша кез келген уақытта жүгіне алады.
Сонымен қатар, елорданың барлық медициналық мекемелері қосымша жабдықтармен, дәрі-дәрмектермен, медициналық маскалармен және қорғаныс құралдарымен жабдықталды.Оған қоса, қалада медицина студенттерінің резерві жасақталды.
Денсаулық сақтау саласын дамыту туралы айта келе, ол мемлекет басшысының тапсырмасына сәйкес азаматтарды "қадамдық қолжетімділікте" медициналық көмекпен қамтамасыз ету жұмыстары жүргізіліп жатқанын атап өтті.
Мәселен, қалада 29 "үйдегі дәрігер" нысаны 180 мыңға жуық адамды қамтыды. Сонымен қатар, отбасы институтын дамыту мақсатында 4 оңалту орталығы ашылды.
Мақаланың түпнұсқасы: https://kaz.nur.kz/society/1896241-elordada-koronaviruspen-kresu-sin-kandaj-saralar-kabyldanuda/