Нұр-Сұлтандағы жаңа көпірдің қашан ашылатыны белгілі болды
Жарияланған күні:
![Көпір Көпір](https://cdn.nur.kz/images/1120x630/db5012c13e655d61.jpeg)
Дүйсенбі күні, яғни 8 тамызда Ұлы дала даңғылында орналасқан көпірде қозғалыс ашылады. Бұл туралы Нұр-Сұлтан қаласының әкімі Алтай Көлгінов Instagram парақшасында мәлімдеді.
"Автомобиль көпірін салу бойынша негізгі жұмыс аяқталды, осылайша көпір үстінде қозғалыс орнайды. Ал көпірді абаттандыру, оның ішінде тротуар бөлігі бойынша соңғы жұмыстар қатар жүретін болады", - деп жазды Көлгінов.
Қала әкімі сондай-ақ А62 көшесінің (А91 көшесінен Нұр-Сұлтан-Қарағанды трассасына дейінгі аралық) құрылысы жүріп жатқанын, бұл көше Қарағанды трассасы мен "Нұрлы Жол" теміржол вокзалы, сол сияқты қаланың сол жағалау бөлігі арасында көлік байланысын қамтамасыз ететінін жазған.
"Бұл маңайда қозғалысты алдағы күзде ашуды жоспарлап отырмыз. Аталмыш көше аудандарды жаңа көпірмен жалғауға мүмкіндік береді.
Ұлы дала даңғылындағы көпір Мәңгілік ел даңғылындағы, А.Байтұрсынұлы, Р. Қошқарбаев, Ж.Нәжімеденов көшелеріндегі, Nova city ауданы мен "Мыңжылдық" аллеясындағы көлік ағынын сейілтуге мүмкіндік береді, бұған қоса жаңа "Нұрлы жол" вокзалы, Тельман және Промышленный елдімекендері, МЕТРО гипермаркеті ауданы, Жұмабаев даңғылы, Жүргенов көшесі және т.б. арасында байланысты арттырады", - дейді әкім.
Ал ️Есіл өзені арқылы өтетін, көлік қозғалысына арналған тағы бір көпір Тәуелсіздік даңғылында келесі жылы ашылады.
"Бұл көпір Тәуелсіздік даңғылын, жаңа теміржол вокзалын, Қошқарбаев даңғылын, Нәжімеденов көшесін, Әзірет Сұлтан мешітін, Байтұрсынұлы, Қордай, Айнакөл көшелерін, Момышұлы даңғылын елорданың сол жағалауымен қосымша байланыс орнатады", - дейді Көлгінов.
Мақаланың түпнұсқасы: https://kaz.nur.kz/society/1982099-nur-sultandagy-zana-kopirdin-qasan-asylatyny-belgili-boldy/