Маңғыстауда жанармай бекетінің ұйықтап жатқан қызметкерін тонау сәті видеоға түсіп қалды

Маңғыстау облысының Бейнеу ауылындағы газ құю бекетінде ұйықтап жатқан ер адамды әлдекімдер тонап кетті. Оқиғаның видеосы желіде тарады, деп хабарлайды Polisia.kz.

Полиция мәліметінше, 7 тамыз күні Бейнеу ауылындағы газ құю бекетінде екі адам ұйықтап жатқан азаматтан 80 мың теңге көлемінде ақша салынған сөмкені ұрлап, оқиға орнынан ізін суытқан.

Тәртіп сақшылары жүргізген жедел-іздестіру іс-шараларының нәтижесінде күдіктілер анықталып, қолға түсті.

Аталған фактіге қатысты Бейнеу аудандық полиция бөлімі Қылмыстық кодекстің 191-бабы 2-бөлігінің 3-тармағы бойынша сотқа дейінгі тергеу жүргізіп жатыр.

"Өзге ақпарат тергеу мүддесінде жария етілмейді", - делінген хабарламада.