Ажар Ғиният: Ауылға жұмысқа баратын әрбір дәрігерге 2 млн теңгеге дейін көмек беріледі

Ауылға баратын дәрігерлерді әлеуметтік жағынан қолдауды күшейту керек. Бұл туралы парламент мәжілісіндегі үкімет сағатында Денсаулық сақтау министрі Ажар Ғиният айтты, деп хабарлайды ҚазАқпарат.

"Министрлік жергілікті атқарушы органдармен бірлесіп тиісті жұмысты жоспарлы түрде жүргізіп жатыр. Біріншіден, медицина кадрларын ауылға тарту үшін түлектердің міндетті түрде 3 жылдық жұмыс істеу нормасы қабылданды. Келген әрбір дәрігерге 1 миллион теңгеден 2 миллион теңгеге дейін көтерме жәрдемақы бөлінеді. Ал кейбір әкімдіктер, яғни Солтүстік Қазақстан және Қостанай облыстарында үш-бес миллионға дейін жәрдемақы бөледі", - деді Ажар Ғиният ауылдағы денсаулық сақтау мәселесін талқылауға арналған үкімет сағатында.

Министр әлі де ауылға баратын дәрігерлерді әлеуметтік жағынан қолдауды күшейту керек екенін айтты.

Ведомство басшысының дерегінше, жыл сайын клиникалық бейіндегі 1500 медицина кадрын даярлауға мемлекеттік білім беру тапсырысы, гранттар бөлінеді. Түлектерді бөлу жүзеге асырылады. Бүгінде ауылдық жерлерде 67 мыңнан астам медицина қызметкері, оның ішінде 13 мың дәрігер жұмыс істейді.

Ажар Ғиният ауылдарда дәрігер жетіспейтінін атап өткен.

"Бұл мәселені шешу үшін ауылда резиденттер міндетті практикадан өту үшін "Резиденттер ауылға" қанатқақты жобасы пысықталып жатыр. Олар ауылда 6 ай мерзімде тәжірибеден өтуі керек. Мемлекет басшысы үш жылдың ішінде резидентураға берілетін гранттар санының жыл сайын 70 пайызға ұлғаюын қамтамасыз етуді тапсырды. Бұл қадамдар дәрігерлерді көбірек дайындауға септігін тигізеді", - деді ведомство басшысы.