Қарызы бар көлік иелері енді кейбір ақылы жолдармен жүре алмауы мүмкін

Қарызы бар көлік иелеріне кейбір ақылы жолдермен жүруге тыйым салынбақ. Бұл туралы Индустрия және инфрақұрылымдық даму министрлігінің автомобиль жолдары комитеті төрағасының орынбасары Жамбыл Бахтияр мәлім етті, деп хабарлайды ҚазАқпарат.

Жамбыл Бахтиярдың сөзінше, бүгінде елімізде кейбір азаматтардың ақылы жолдар бойынша қарызы 5 млрд теңгеден асқан.

"Қазақстандықтардың ақылы жолдар бойынша 5 млрд теңгеден астам қарызы бар. Аталған сома өткен жылдың 23 қарашасынан бастап, биыл 1 желтоқсан аралығында жиналды. Көлік иелері ақылы жолдар бойынша қарызын белгіленген уақытта төлеуі тиіс. Мысалы, көлік иесінің 300 мың теңге қарызы болса, ол берешегін кестеге сай 2 жыл көлемінде төлейді", - дейді Жамбыл Бахтияр Индустрия және инфрақұрылымдық даму министрлігінің "Ашық сағат алаңы" жобасының эфирінде.

Министрлік өкілінің айтуынша, елімізде қазір 2,2 мың шақырым ақылы жол бар. Олардан жыл басынан бері 20 млрд теңге табыс түскен. Жиналған қаражат жолдарды күтіп ұстау мен жөндеуге жұмсалады дейді ол.

"Биылға жоспарланған жаңа ақылы жолдарды енгізу кейінге қалдырылды. Себебі тұрғындар абоненттік төлемді алып тастауды сұрап отыр. Сондай-ақ 2 санаттағы автомобиль жолдарын ақылы етуге келсек, бұл мәселе халықтың оң келісімінен кейін ғана шешіледі. Дегенмен біз ақылы жолдардан бас тарта алмаймыз.

Жалпы 15 желтоқсаннан бастап елімізде жаңа абоненттік төлем жүйесі енгізіледі. Ол бойынша ақылы жолдар екі түрге бөлінеді. Бірінші, жабық жүйе. Яғни "Астана-Щучинск", "Қарағанды- Астана", "Алматы-Қапшағай" тасжолдары бойынша қарызы бар көлік иелері берешегін өтегеннен кейін ғана жүре алады. Екінші ашық жүйе. Ол бойынша көлік иесі төлемеген жағдайда қарызы жинала береді", - дейді Жамбыл Бахтияр.