Бас прокуратура: Кәсіпкерлерге қатысты қылмыстық іс қозғау көрсеткіші 2,5 есе азайды

Бас прокуратура бұған дейін елімізде кәсіпкерлерге қатысты ай сайын 150-ге жуық іс қозғалса, бүгінге олардың саны 2,5 есеге азайғанын мәлімдеді, деп хабарлайды ведомствоның ресми сайты.

Ведомствоның мәліметінше, Бас прокуратура былтыр мамыр айынан бастап кәсіпкерлерге қатысты басталған сотқа дейінгі барлық тергеп-тексерулерге тексеріс жүргізгенін мәлімдеді.

"2022 жылдың мамыр айынан бастап прокурорлар кәсіпкерлерге қатысты басталған сотқа дейінгі барлық тергеп-тексерулерге тексеріс жүргізді. Осы кезеңде экономика саласында 360-тан астам қылмыстық іс тоқтатылды.

2022 жылғы 2 қыркүйекте Бас прокурор қылмыстық қудалау органдарына бизнес субъектілеріне қатысты сотқа дейінгі тергеп-тексерулерді тіркеу тәртібін егжей-тегжейлі регламенттейтін арнайы нұсқау жіберді.

Сондай-ақ жаңа "Қылмыстық қудалаудың заңдылығын қадағалауды ұйымдастыру жөніндегі нұсқаулық" қабылданды, оған сәйкес прокурорлар бизнес субъектілеріне қатысты әрбір іс бойынша сотқа дейінгі тергеп-тексерудің басталуының заңдылығын бір тәулік мерзімде тексеруге және бұзушылықтар анықталған кезде қылмыстық қудалауды дереу тоқтатуға міндетті.

Іс заңды түрде қозғалған деп танылған жағдайларда прокурор кейін әрбір 15 күн сайын тергеу жүргізудің заңдылығы мен сипатын оның толықтығы мен объективтілігін қамтамасыз ете отырып тексереді", - деп жазылған хабарламада.

Сонымен қатар құзырлы орган жаңа талаптар оң нәтиже бергенін атап өткен.

"Жаңа талаптар айтарлықтай оң нәтиже берді. Егер бұрын еліміз бойынша кәсіпкерлерге қатысты ай сайын 150-ге жуық іс қозғалса, қазір олардың саны 2,5 есеге азайды.

Прокуратураның қадағалау жұмысының тағы бір бағыты бизнес проблемаларын тиімді шешу болып табылады.

Мәселен, 2022 жылы прокурорлардың көмегімен бизнес субъектілері үшін 55 өткір мәселе шешілді. Олардың ішінде шаруа қожалықтарын сумен қамтамасыз ету, берешек пен субсидиялар төлеу, әлеуметтік маңызы бар өнімдерге қарыз алуға шектеулерді жою, тексерушілердің коммерциялық объектілерге бару практикасының  жолын кесу", - деп жазылған баспасөз хабрламасында.

Бұдан бөлек ведомство өкілдері прокуратура органдарының бизнесті қорғау жөніндегі мобильді топтары жұмысын  24/7 тәулік бойына жалғастырып жатқандығын хабарлады.

"Барлық жерде прокуратура органдарының бизнесті қорғау жөніндегі мобильді топтары жұмысын  24/7 тәулік бойына жалғастыруда.

Өткен жылы олар кәсіпкерлердің 3 мыңнан астам сигналын пысықтады, әрбір 4-ші факті (759) расталды.

Алматы облысында арнайы "Бизнес құқықтарын қорғау жөніндегі мобильдік топтың боты" енгізілді. Бұл тек бір QR коды арқылы прокуратураға сигнал жіберуге мүмкіндік береді.

IT-ресурстарды тиімді пайдаланудың және қадағалау актілерін енгізудің арқасында 7,1 мыңнан астам кәсіпкер 1,3 млрд теңге сомаға заңсыз айыппұлдардан босатылды, 9 мыңнан астам заңсыз тексерістер мен бақылаудың өзге де нысандарының жолын кесіп, жойылды", - деп жазылған хабарламада.

Сол сияқты ведомство ұсынған мәліметтерге сәйкес, бақылаушы және жергілікті атқарушы органдардың кәсіпкерлердің қызметіне араласуын ретке келтіру үшін, 2023 жылға арналған бизнесті қорғау жөніндегі бірлескен іс-қимылдардың кешенді жоспары бекітілгені белгілі болды.

"Жалпы, 2022 жылы кәсіпкерлік саласындағы бұзушылықтар бойынша 1 330 қадағалау актісі енгізілді, уәкілетті органдардың 1230 заңсыз тыйым салу және шектеу шаралары жойылды, 1 240 адам жауапқа тартылды.

Бақылаушы және жергілікті атқарушы органдардың кәсіпкерлердің қызметіне араласуын ретке келтіру үшін 2023 жылға арналған бизнесті қорғау жөніндегі бірлескен іс-қимылдардың кешенді жоспары бекітілді. Бұл прокуратура органдарының «Атамекен» ҰКП және мемлекеттік органдармен бірлескен іс-қимылдарының нақты «жол картасы». Жоспар кәсіпкерлерді қорғау тетіктерін күшейтуге мүмкіндік береді және бизнес-ахуалды жақсартуға ықпал ететін болады.

Кәсіпкерлердің құқықтары бұзылған жағдайда дереу 115 (Call-орталық), (7172) 30-17-93 немесе +7 702 629 75 61 нөмірлері бойынша (Бас прокуратураның мобильді тобы) немесе аумақтық прокуратура органдарының сайттарында көрсетілген нөмірлер бойынша тікелей хабарласуларыңызды сұраймыз", - дейді ведомство өкілдері.