Алматы облысында кәсіпкерді бопсалады деген күдікпен бес адам ұсталды

Алматы облысының полицейлері Талғар қаласының кәсіпкерін бопсалады деген күдікпен бес адамды ұстады, деп хабарлайды Polisia.kz.

Ақпараттық меди порталдың жазуынша, Алматы облысы ПД ҰҚҚКБ-ға белгісіз тұлғаларға қатысты жедел ақпарат келіп түскен.

Хабарламадан белгісіз тұлғалардың зорлық-зомбылық көрсету арқылы Талғар қаласының кәсіпкерінен ақша мен қымбат көлік талап еткені белгілі болған.

Қылмыстық істі кәсіпкердің арызы негізінде Талғар ауданының полиция басқармасы Қылмыстық кодекстің 194-бабы 2-бөлігінің 2-тармағы ("Алдын ала сөз байласу бойынша адамдар тобы жасаған бопсалау") бойынша тіркеген.

Бұдан кейін жедел-іздестіру іс-шаралары жүргізілген. Оның нәтижесінде арнайы бөлімшенің жауынгерлерінің қатысуымен Алматы облысы ПД ҰҚҚКБ қызметкерлері ақшалай қаражат алу кезінде Алматы қаласы мен Алматы облысының 20-23 жас аралығындағы бес тұрғынын ұстаған.

Полиция қазіргі кезде күдіктілердің осыған ұқсас басқа да қылмыстарға қатысы бар-жоғы тексеріліп жатқанын, қылмыстық іс бойынша тергеу барысы облыстық полиция департаментінің бақылауында екенін атап өтті.