Найзағай, бұршақ және қатты жаңбыр: бүгін Қазақстанның басым бөлігінде дауылдық ескерту жарияланды

Сенбі, 24 маусымда Қазақстанның 19 облысында дауылдық ескерту жарияланды. Бұл туралы KAZ.NUR.KZ "Қазгидромет" РМК ресми сайтына сілтеме жасап хабарлайды.

Метеорологтардың мәліметінше, бүгін Алматы облысының оңтүстігі мен таулы аймақтарында найзағай ойнап, бұршақ жаууы мүмкін, жел екпіні 17-22 м/с дейін жетеді. Облыстың солтүстігі мен оңтүстігінде өрт шығу қаупі жоғары екені ескертілді.

Синоптиктер 24 маусымда, түнде Алматыда найзағай күтіліп, өрт шығу қаупі жоғары екенін ескертті. Сондай-ақ, Астанада да найзағай ойнайды деп болжанған.

Ұлытау, Ақмола, Қарағанды, Батыс Қазақстан облыстарында найзағай ойнап, жел күшейеді. Найзағай мен қатты желден бөлек бұршақ жаууы мүмкін. Бұл ретте төрт облыста да өрт шығу қаупі сақталады.

Түркістан облысының тау асуларында желдің жылдамдығы 15-20 м/с-қа дейін күшеюіне байланысты дауылдық ескерту жарияланды. Сонымен қатар Шымкентте 24-26 маусым аралығында өрт шығу қаупі жоғары деп болжанған.

Ертең Шығыс Қазақстан, Абай облыстарында қатты жаңбыр, бұршақ жауып, бұрқасын болады деп күтілуде.

Ақтөбе облысында жел екпіні 15 м/с-қа дейін жетеді, сондай-ақ, облыстың оңтүстігінде өрт шығу қаупі жоғары екені ескертілді.

Синоптиктер Қызылорда облысында шаңды дауыл тұрып,, Солтүстік Қазақстан облысында тұман түсіп, найзағай ойнайды деп болжаған. Сондай-ақ мамандар Маңғыстау облысында да өр шығу қаупі жоғары екенін ескертті.