Бас прокуратура елімізде қанша адамға іздеу жарияланғанын мәлімдеді

Қазақстанның Бас прокуратурасы Telegram-дағы ресми арнасында іздестіріліп жатқан адамдардың статистикасын жариялады.

Бас прокуратураның Құқықтық статистика және арнайы есепке алу жөніндегі комитеті дерегіне сүйеніп хабарлауынша, қазіргі уақытта 10 748 адам іздестірілуде, олардың ішінде 2 176 адам хабар-ошарсыз жоғалған.

Өңірлер бойынша жоғалған адамдар:

• Алматы қаласы – 287;
• Қарағанды облысы – 221;
• Павлодар облысы – 170;
• Алматы облысы – 167 тіркелген.

Бас прокуратураның мәліметінше, көбіне 30-дан 49 жас аралығындағы ер адамдардың 77 пайызы әр түрлі жағдайларда жоғалады.

• үйден кетіп, оралмаған адам саны – 1 634;
• автокөлікпен жоғалған – 74;
• жұмыстан кеткен – 36.

Сондай-ақ елде тергеу мен соттан жасырынған 2 372 адам іздеуде.

Іздеуде жүргендердің 89 пайызы 31 және 40 жас аралығындағы ер адамдар.

Олардың басым бөлігі алаяқтық (510), ұрлық (318) және кісі өлтіру (146) дерегі бойынша іздеуге жарияланған:

• Алматы қаласында – 514;
• Астана қаласында – 185;
• Шымкент қаласында – 155;
• Алматы – 143;
• Қарағанды облысында – 140 адам іздестірілуде.