"Иллюминаторды изолентамен жапсырған": Qazaq Air ұшақта болған жайтқа қатысты пікір білдірді

Әлеуметтік желіде Qazaq Air ұшағының бортында детальдардың бірі изолентамен жапсырылғаны түсірілген видео тарады. Әуе тасымалдаушы компания болған жайтқа қатысты пікір білдірді, деп хабарлайды KAZ.NUR.KZ.

Блогер Сағындық Аташұлы ұшақтағы иллюминатордың бірі изолентамен жапсырылғанын видеоға түсіріп, өзінің TikTok-парақшасында жариялаған.

Блогер видеоны Qazaq Air ұшағының бортында Ақтөбе-Астана рейсімен ұшуы кезінде түсірген.

Компанияның баспасөз қызметі бұл жайтқа қатысты NUR.KZ тілшісіне пікір білдірді.

"2023 жылдың 22 қазанында DHC-8-400 UP-DH003 бортында рейс кезінде жолаушылардың бірі байқамай терезенің жақтаушысымен қатар күнге қарсы пердесін жұлып алған. Салдарынан оны бекітіп тұратын клипсасы (қыстырғышы - ред.) босап қалған. Жолсеріктердің бірі қолда бар дүниені қолдана отырып, иллюминатор пердесінің сынып қалған жақтаушысын қайта жапсырған. Оның нақты бір міндеті жоқ әрі ұшақ салонының герметизациясына еш әсер етпейді, ол тек интерьердің эстетикалық бөлігі", - деп атап өтті компанияның баспасөз қызметі.

Әуе тасымалдаушының мәліметіне сүйенсек, рейс кезінде жолаушылардың өмірі мен денсаулығына еш қауіп төнген жоқ.

Qazaq Air ұшақтың бүлінген деталі Астана әуежайына ұшып келгеннен кейін тез арада жөнделгенін мәлімдеді.

"Жолаушылардан туындаған қолайсыздықтар үшін кешірім өтінеміз", - деп қосты компанияның баспасөз қызметі.