Алматыда шақыруға келген дәрігер мен жедел жәрдем фельдшері соққыға жығылды

Алматыда жедел жәрдем дәрігері мен фельдшері қызмет атқару кезінде соққыға жығылған. Күдікті көмекке жүгінген ер адам болып шықты, деп хабарлайды қалалық қоғамдық денсаулық сақтау басқармасы баспасөз қызметіне сілтеме жасаған KAZ.NUR.KZ.

"Кезекті шақырудан оралған кезде ер адам жедел жәрдем қызметкерлеріне жүгініп, әйелге көмек көрсетуді өтінген. Медицина қызметкерлері әйелді тексеру кезінде ер адам дәрігер мен фельдшерді соққыға жығып, денсаулығына зиян келтірген", – деп атап өтті Алматы қалалық қоғамдық денсаулық сақтау басқармасы баспасөз қызметі.

Шабуыл жасады деген күдікке ілінген ер адамға қатысты арыз Алатау аудандық полиция бөлімінде процессуалдық шешім қабылдау сатысында қаралып жатыр.

Зардап шеккен медицина қызметкерлерінің жағдайына қанағаттанарлық деген баға берілді, олар амбулаторлық емдеуде.