Мембағдарламамен алған: СҚО-да 200 отбасы жылусыз қалды

Петропавлда мемлекеттік бағдарламамен пәтер алған тұрғындар үйдің жағдайын айтып шағымданып жатыр. Жаңа жыл қарсаңында олар жылусыз қалған, бірақ проблема мұнымен бітпейді. Бұл туралы "Астана" телеарнасы хабарлады.

Телеарна тілшілерінің мәліметінше, екі жыл бұрын 200-ге жуық отбасы мемлекеттік бағдарлама бойынша Жас Өркен шағынауданындағы жаңа үйден пәтер кілттерін алған. Алайда бірінші күннен бастап тұрғындар проблемаларды байқай бастаған: жарылған балкон жақтаулары, әйнектер және тоқтаусыз су ағатын шатыр. Ал Жаңа жыл қарсаңында көпқабатты үйдің тұрғындары жылусыз қалған.

"Бір терезе бір ғана бұрандаға ілініп тұр. Бітті! Істегенінің бәрін қайта жасау керек, бәрін ауыстыру керек. Мына терезені ауыстыру үшін миллион теңгедей шығындау қажет. Менде осынша ақша жоқ", - дейді тұрғындардың бірі.

Тұрғын үй алу үшін әйел "Толық емес отбасы" санатында тұрғаны хабарланды.

Тілшілер екі жыл бұрын кезекте тұрғандарға, оның ішінде көпбалалы отбасыларға, мүгедектерге және азаматтардың басқа да санаттарына пәтер кілттері табысталғанын айтады. Бірақ тұрғындар бұл баспаналарды тегін емес, ипотекаға алыпты. Бірнеше күн бұрын тұрғындар тағы бір апатқа байланысты жылусыз қалған. Жертөледе жылыту құбыры жарылған.

Қала әкімдігі өкілдері де бұл үйден проблема көп шығатынын айтады. Шенеуніктердің сөзінше, көпқабатты үйді үш мердігер компания салған. Алайда қазір үй жергілікті ТШК балансында екен.

"Үй мүлік иелері бірлестігінің балансына өтпеген. Қазір жүргізіліп жатқан жұмыстар бар, оларды үнемі тексеріп отыру керек. Бұл жұмысты жүргізгіміз келеді, үйді балансқа бергіміз келеді. Бірақ егер кепілдік жағдайлары болса – өндірістік ақаулар, сорғы ағауы және тағы да басқасы болса - біз бәрін жоямыз. Жылу беру мамандары қандай да бір шешімін ұсына жатар, біз осы бағытта жұмыс істейміз. Бірақ тағы да айта кетейін, жылу алмастырғышта да барлық параметр сәйкес келеді", - деп сендірді Петропавл әкімі Біржан Көшербаев.

Қазіргі уақытта апат жойылып, қала тұрғындарының пәтерлеріне жылу берілген, бірақ тұрғындар апат қайталанатынына сенімді. Олар жергілікті биліктен кепілдік бойынша барлық кемшілікті түзетуді сұрайды. Жергілікті билік барлық шағымды қарауға уәде берді.