Батыс Қазақстан облысында жер қатынастары бөлімінің басшысы сот залында қамауға алынды

Батыс Қазақстан облысы Шыңғырлау аудандық жер қатынастары бөлімінің басшысы Қайрат Төлегеновке үкім шықты. Ол кінәлі деп танылып, үш жылға бас бостандығынан айырылды, сот залында қамауға алынды, деп жазады "Орал апталығы" басылымы.

Тергеу органдары Қайрат Төлегеновті ҚР Қылмыстық кодексінің 361-бабының 3-тармағы, 4-бөлігі (Ауыр зардаптарға әкеп соққан лауазымдық өкілеттіктерді теріс пайдалану) бойынша айыптаған.

Тергеу нұсқасы бойынша, Қайрат Төлегенов Бәйтерек ауданының жер қатынастары бөлімінің басшысы қызметін атқара отырып, 2015 жылы мемлекетке ірі көлемде залал келтіріп, ауыр зардаптарға әкеп соққан сыбайлас жемқорлық қылмыс жасаған деген күдікке ілінді.

Лауазымдық өкілеттігін пайдалана отырып, Төлегенов азамат Ділмановқа екі жер учаскесін заңсыз берді. Ол кадастрлық құны төмен Мичурин және Макаров ауылдық округтерінде жалпы ауданы 40 гектар болатын екі жер учаскесін жеке меншікке алды деп айыпталды.

Бәйтерек ауданы прокуратурасының аға прокуроры Исмайл Дінмұхамед соттан 4 жыл 8 ай жаза тағайындауды сұрады.

Төлегенов кінәсін мойындамады және сотқа өзін неге кінәсіз санайтынын айтты.

"Жеке өзім жер учаскелерін беру туралы шешім қабылдамаймын, мұны арнайы жер комиссиясы алқалы түрде жасайды. Мен қандай да бір фактілерді комиссия қатысушыларының назарына жеткізбегенім немесе хабарламағаным – бұл менің міндеттеріме кірмейді",- деді Қайрат Төлегенов.

Оның айтуынша, сот отырысы кезінде жер комиссиясының барлық мүшелері сотқа өз айғақтарын берген.

"Комиссияның барлық мүшелері өз бетінше шешім қабылдады, бұл туралы олар да сотқа мәлімдеді. Жер беру туралы қаулыға келетін болсақ, мен тек қаулы жобасын дайындаймын, ал ол бойынша шешімді әкімдікте қарап, қабылдайды.

Мен өз тарапымнан айыптауды, менің жаман ниетім бар екенін немесе біреуді әдейі адастырғанымды түсінбеймін. Бірінші күн жұмыс істеп отырған жоқпын және бөлімге түсетін азаматтардың өтініштері заңға сәйкес қаралады", – деді сотталушы.

Ол жер учаскесінің кадастрлық құны туралы актіні бекітуде әріптестеріне сенбеуге негіз жоқ екенін атап өтті. Сонымен қатар жерді ол бағаламағанын, "Гепразем" бағалағанын айтты.

Қайрат Төлегенов сотқа үш жас баласы бар екенін, отбасындағы жалғыз асыраушы екенін айтты.

Үкім шыққаннан кейін сотталушы қамауға алынды.

Үкімге сәйкес заңсыз берілген жер учаскелері мемлекет меншігіне қайтарылуы керек.