Қайрат Сатыбалдының ұлына тиесілі "Байсат" базарының бір бөлігі мемлекетке қайтарылды

Алматы прокурорлары Қайрат Сатыбалдының ұлына тиесілі "Байсат" базарының бір бөлігін мемлекетке қайтарды. Бұл туралы KAZ.NUR.KZ Алматы қаласының прокуратурасына сілтеме жасап хабарлады.

17 қаңтардан бастап Алматы қаласының Мамандандырылған ауданаралық экономикалық сотының шешімімен "Алматы жылу" холдинг кешенінің (қазіргі "Байсат" базары) мүлкімен жасалған барлық мәмілені жарамсыз деп тану туралы шешімі заңды күшіне енді.

Сотта қызмет бейінін сақтау және иеліктен шығаруға тыйым салу туралы шарттың талаптарын сақтамау бойынша міндетті сату шартынсыз 4 жыл бұрынғы мүлікті бағалау туралы өзекті емес есепті қолдануда көрсетілген кешенді заңсыз сату фактілері расталды.

"Жалпы ауданы 4 221,4 м2 3 объектіден және 1,4 га жерден тұратын мүлік Бауыржан Нурсултанға (Қайрат Сатыбалды ұлы) тиесілі "ҚазГерСтрой бірлескен кәсіпорны" ЖШС және "Astana Finansial Group" ЖШС өзара үлестес компанияларының меншігінде болды.

Бұған дейін сотқа дейінгі тергеу аясында Қайрат Сатыбалды "Байсат" базарының басым бөлігін өз еркімен қайтарып берген болатын", - делінген хабарда.