Неге жер сілкінісі туралы SMS кешігіп жетті: министрлік өкілі жауап берді

Мәжіліс кулуарында ЦДИАӨМ басшысының орынбасары Асхат Оразбек алматылықтарға жер сілкінісі туралы SMS хабарлама неліктен дер кезінде жетпегенін түсіндірді. Бұл туралы KAZ.NUR.KZ тілшісі хабарлайды.

Вице-министрге ЦДИАӨМ төтенше жағдай кезінде Алматыда SMS хабарлама жіберуде ақау пайда болуына қатысты тексеру жүргізді ме деген сұрақ қойылды.

"Ешқандай ақау болған жоқ, хабарлама баяу жетті. Бұл қашан болды? 23 қаңтар. Бүгін бізде 24 қаңтар. Үлгермедік деп жауап беремін", - деді ол.

Ол министрлік төтенше жағдайлар кезінде қазақстандықтарға SMS хабарламалар үшін бюджеттен ақша бөлмейтінін, өйткені байланыс операторлары хабарлама жіберуді өз қаражаты есебінен қамтамасыз ету керектігін айтты.

"Біз ақша бөлген жоқпыз, өйткені азаматтық қорғау туралы заңның алтыншы бабы аясында операторлар SMS хабарламаларды жаппай таратуға міндетті", - деді Асхат Оразбек.

Оразбектің айтуынша, Қазақстанда жұмыс істейтін байланыс операторлары Төтенше жағдайлар министрлігінен хабарлама алған бойда SMS хабарлама жіберген. Дегенмен хабарламалардың байланыс желілері арқылы өтуіне ұзақ уақыт кеткен.

"Олар уақытында жіберді, SMS барып үлгермеді. Бұл мәселе.(...) Біз оны кешенді түрде шешеміз. Жедел хабар алмасу жүйесін енгіземіз.

Бүгін мәжілісте байланыс туралы заң бойынша бірінші оқылым болды. Бұл заң жобасын екінші оқылымда енгізу үшін кеше депутаттармен кездестік. Жедел хабарламалар әрбір абонентті бірнеше секунд ішінде хабардар етуге мүмкіндік береді. Бұл шешім", - деді Асхат Оразбек.