Алматыда оқушы зорланды деген күдікпен қозғалған қылмыстық іс тоқтатылды

Алматы полициясы қала мектептерінің бірінде 1-сынып оқушысы зорланды деген күдікпен қозғалған қылмыстық істі тоқтатты. Бұл туралы полицияға сілтеме жасаған KAZ.NUR.KZ хабарлайды.

Алматы полиция департаментінің хабарлауынша, бұл факт бойынша қылмыстық істі тергеу қылмыс жайты болмауына байланысты тоқтатылды.

"Арнайы мамандардың сараптамалары мен зерттеулері зорлау фактісін растамады. Қалалық прокуратура тергеудің шешімімен келісті", - делінген ресми хабарламада.

Айта кетейік, өткен жылдың қазан айының басында әлеуметтік желіде баласын мектепте зорлады деген әйелдің мәлімдемесі жазылған видео тараған еді. Оның айтуынша, оқиға 12 қыркүйекте Алматыда болған. Кейін баланы дәрігерлер тексергені мәлім болды.

Алматы полиция департаменті бұл факт бойынша іс тіркеліп, тергеу басталғанын, қажетті сараптамалар тағайындалғанын хабарлады. Іс ерекше бақылауға алынды.

Кейін Оқу-ағарту министрлігі Балалар құқығын қорғау комитетінің төрағасы зардап шеккен баланың анасымен, сондай-ақ халықаралық мектеп басшылығымен байланыста екенін мәлімдеді. Отбасына көмек ұсынылды.

Бұл жағдайға білім мекемесінің директоры да түсініктеме берді. Директор мектеп тергеуге мүмкіндігінше көмектесуге дайын екенін жеткізді.

Оқу-ағарту министрі Ғани Бейсембаев бұл іске жергілікті балалар құқығын қорғау өкілдігі мен басқа да құзырлы ұйымдар жұмылдырылғанын айтты.

Біраз уақыттан кейін баланың анасы жаңа мәлімдеме жасап, ІІМ мен Бас прокурорға жүгінді. Әйел күдіктінің әлі анықталмағанын айтты.

Ол сондай-ақ Бостандық ауданы полиция бөлімінің сараптамасының нәтижелерімен танысқанын айтты - сол жерде оның айтуынша, баланың жарақаты құрттар мен іш қатудың салдары деп түсіндірілген.

Полиция әйелдің мәлімдемесіне түсініктеме бере отырып, сарапшылардың қосымша сараптамасы тағайындалғанын, алайда оны "азаматтың ұлын сараптамадан өткізуге құлықсыздығынан" жүргізу мүмкін болмағанын хабарлады.

Ал қараша айының соңында полиция баланың анасы тергеуге кедергі жасап жатқанын айтты. Құқық қорғау органдары сарапшылардың баланың денесінен ешқандай жарақат немесе зорлық-зомбылық белгілерін таппағанын тағы да еске салды.

"Осы жазбалар бойынша, 11-14 қыркүйек аралығында баланың мектептегі дәретханаға 57 рет кіріп, 2-3 минут бойы тұрғаны анықталды. Дәретханаға бір уақытта басқа адамдардың келгені тіркелмеген", - деп мәлімдеді полиция департаментінің өкілдері.

Полиция хабарламасында іс бойынша сот-биологиялық және молекулалық геномдық сараптамалар жүргізілгені, оның қорытындысы бойынша баланың іш киімі мен шалбарынан тек өзіне ғана тиесілі биоқабаттар табылғаны айтылған. Басқа іздер табылмады.