Астана маңындағы әскери техника: Қорғаныс министрлігі қазақстандықтарға үндеу жасады

Қорғаныс министрлігі қазақстандықтарды арнайы шараға түсіністікпен қарап, жалған хабарламалар таратпауды сұрады. Бұл туралы KAZ.NUR.KZ ведомствоға сілтеме жасап хабарлайды.

Қорғаныс министрлігі Telegrem-дағы ресми арнасының мәліметінше, Қарулы күштердің жауынгерлік дайындық бағдарламасы шеңберінде 13 наурызда Ақмола гарнизоны әскери бөлімдерінің әскери қызметшілері Астана қаласының маңындағы белгіленген аудандарға жауынгерлік техникамен марш жасайды.

"Іс-шара гарнизон әскери бөлімшелері күштері мен құралдарының жауынгерлік әзірлігін кешенді тексерудің кезекті кезеңіне бағытталған. Аталған уақыт аралығында елорданың маңында, сондай-ақ Қарағанды трассасында әскери техника легі өтіп бара жатқан кезде жолдарда көлік құралдары қозғалысының уақытша шектеулері енгізілуі мүмкін екенін хабарлаймыз", - делінген хабарда.

Осыған байланысты ведомство өкілдері азаматтардан өтіп жатқан іс-шараларға түсіністікпен қарауды және тыныштықты сақтауды сұрады.

Сонымен қатар министрліктегілер әлеуметтік желілерді пайдаланушылардан әскери техниканың қозғалысы туралы жалған хабарламалар мен бейнематериалдар таратпауға және тек ресми ақпарат көздеріне сенуге шақырды.