Бас прокуратура бұрынғы ішкі істер министрі Ерлан Тұрғымбаевтың ісіне қатысты мәлімдеме жасады

Бас прокуратура Ішкі істер министрлігінің бұрынғы басшысы Ерлан Тұрғымбаевтың ісіне қатысты мәлімдеме жасады. Бұл туралы KAZ.NUR.KZ құзырлы органға сілтеме жасап хабарлайды.

Бас прокуратура бұрынғы ішкі істер министрі Ерлан Тұрғымбаевты және полиция органдарының басқа да басшыларын қылмыстық қудалау туралы түрлі Telegram-арналарда таратылған ақпаратқа қатысты пікір білдірді.

"2022 жылдың басынан бастап Бас прокуратура қаңтар оқиғалары кезеңінде құқықтық тәртіп пен қауіпсіздікті қамтамасыз етпеуге, сондай-ақ азаматтарға азаптауды қолдануға байланысты күш органдарының қызметкерлеріне қатысты тергеп-тексерулерді жалғастыруда.   

Оларды жасағаны үшін соттармен облыстық полиция және ұлттық қауіпсіздік органдарының бірқатар басшылары мен қызметкерлері сотталды.

Жүргізіліп жатқан тергеп-тексерулер шеңберінде ішкі істер экс-министрі Ерлан Тұрғымбаевтан жауап алынды", - делінген Бас прокуратураның мәлімдемесінде.

Сондай-ақ Бас прокуратура Алматы облысы Қарасай ауданы Қошмамбет ауылында орналасқан арнайы қабылдау жағдайында ұсталған азаматтарға азаптауды қолдану туралы іс бойынша дәлелдемелер жинаған.

"2024 жылдың 16 наурызында осы қылмысты жасағаны үшін Қарасай ауданының арнайы қабылдау орыны және полиция басқармасының бұрынғы басшылары қамауға алынды.

Бұдан басқа, қызметтік атыс қаруын ұрлау фактілері бойынша Талдықорған қаласы полиция басқармасының бұрынғы басшылығына қатысты тергеп-тексеру жалғасуда.    

Осы тергеп-тексерулер бойынша басқа да мәліметтер тергеп-тексерудің, сондай-ақ азаматтардың құқықтары мен заңды мүдделерін сақтай отырып, жұртшылыққа жеткізілетін болады", - делінген хабарда.

Айта кетейік, осыған дейін ІІМ басшысы Ержан Сәденов экс-ішкі істер министрі Тұрғымбаевқа қатысты қозғалған қылмыстық іс туралы пікір білдірген болатын.