Мемлекет басшысы: Биыл елімізде 4 ауқымды жоба қолға алынады

Қазақстан президенті Қасым-Жомарт Тоқаев Алматыдағы Наурыз мерекесіне арналған салтанатты жиында биыл елімізде 4 ауқымды жоба қолға алынатынын айтты. Бұл туралы Ақорданың ресми Telegram-каналына сілтеме жасаған KAZ.NUR.KZ хабарлайды.

Атап айтқанда, көптеген жылу орталығы және инженерлік желілер жаңғыртылады, 12 мың шақырым жол салынып, жөнделеді.

Сонымен қатар 300 мың адам табиғи газдың игілігін көре бастайды және ауыл мен аудан тұрғындары үшін жаңа тұрғын үй бағдарламасы іске қосылады.

Мемлекет басшысының айтуынша, әлеуметтік жағынан осал топтағы азаматтар үшін несие өсімі 7 пайыздан аспайтын болады.

Ал жалға берілетін баспана саны бірнеше есе көбейеді.

"Мұның бәрі халықтың тұрмыс сапасын жақсартуға ықпал етері сөзсіз. Елге, халыққа арналған осындай игі шаралар міндетті түрде жалғасын табады. Баршаңызды бүгінгі Көктем мерекесімен тағы да шын жүректен құттықтаймын! Ұлыс оң болсын! Ақ мол болсын! Еліміз аман, жұртымыз тыныш болсын", — деді мемлекет басшысы.

Қасым-Жомарт Тоқаев құттықтау сөзінен кейін алаңға жиналған жұртшылықпен бірге мерекелік концертті тамашалады.