Көкшетауда Қылшақты өзені қайтадан арнасынан асып, бірнеше ғимаратты су басты

29 наурызда таңертең Көкшетау қаласында Қылшақты өзені арнасынан асып, 16 жеке үй, 29 жеке аула аумағы және бірнеше нысанды су басты. Бұл туралы KAZ.NUR.KZ ТЖМ-ге сілтеме жасап хабарлайды.

Ведомство мәліметінше, қаладағы 16 жеке үй, 29 жеке аула аумағы, 12 көп қабатты тұрғын үй ауласы, сондай-ақ "Ертөстік" балабақшасының 1-қабатын су басты.

"Қазіргі уақытта 150 м жағалауды нығайту жұмыстары жүргізіліп жатыр, 280 тонна инертті материалдар төселді", - делінген хабарда.

ТЖМ 111 адам, оның ішінде 30 бала эвакуацияланғанын хабарлады.

Су басқан учаскелерде полиция қызметкерлері мен жергілікті атқарушы органдардың кезекшілігі ұйымдастырылды.

"ТЖД-жеке құрамның 104 адамы, 14 техника, 9 мотопомпалар, ПД 7 адамы және 7 техника, ЖАО – 126 адам, 64 техника, 10 мотопомпалар жұмылдырылды. Бұл бағыттағы жұмыс жалғасуда", - делінген ТЖМ хабарламасында.

Айта кетейік, 28 наурызда Көкшетауда өзен арнасынан асып, бірнеше тұрғын үйдің ауласын су басқанын хабарлаған едік.