Елден контрабандалық жолмен алтын әкетті деген күдікті Түркияда ұсталды

Экономикалық контрабанда жасаған күдікті Түркиядан Қазақстанға жеткізілді, деп хабарлайды Polisia.kz.

Қазақстан ІІМ Интерпол ҰОБ-ның сұрауы бойынша түрік әріптестерімен бірлескен әрекет барысында және ҰҚК мен ҚР елшілігінің қолдауымен "қызыл бюллетень" бойынша халықаралық іздеуде жүрген ер адам ұсталды.

Ол экономикалық контрабанда жасағаны үшін іздеуде болған. Ол өзінің заңсыз іс-әрекеттерімен 56 млн теңгеден астам сомаға залал келтірді, делінген хабарда.

Белгілі болғандай, 2017 жылы күдікті және басқа да адамдар Қазақстан Республикасының аумағынан Түркия Республикасына бағалы металл – алтынды заңсыз әкеткен.

Қазіргі таңда ер адам депортацияланып, Алматыда қамауға алынды. Ер адам көліктегі полиция департаментінің бастамасымен ұсталғаны айтылады.