Алматы тұрғыны сауда орталығына жарылғыш зат қою туралы хабарлама алған

Алматы тұрғыны сауда орталығының ғимаратына жарылғыш зат қою туралы ұсыныс жазылған хабарлама алды. Хабарламаны жіберген Жетісу облысының мектеп оқушысы болып шықты, деп хабарлайды KAZ.NUR.KZ Терроризмге қарсы орталығына сілтеме жасап.

Ведомство мәліметінше, Алматы тұрғыны WhatsApp мессенджеріне белгісіз нөмірден "Сәлеметсіз бе, сізге бір шаруам бар, "Вегас" сауда орталығына 800 мың рубльге "мина" қоясыз ба" деген хабарлама алған.

Хабарламаны оқыған соң азамат А. хабарлама жіберген нөмірді блокқа қойып, полицияға хабарласқан.

"Жедел іздестіру шаралары барысында Алматы қалалық ПД қызметкерлері Жетісу өңіріндегі әріптестерімен бірлесіп, хабарламаны Талдықорған қаласының аумағында тұратын 2014 жылы туған 3-сынып оқушысы жібергенін анықтады.

Жасөспірімнен ата-анасының көзінше оның әрекетінің мақсатын сұраған кезде, әзілдегенін айтқан", - делінген хабарламада.

Кәмелетке толмаған баланың ата-анасы әкімшілік жауапкершілікке тартылды.