Ақтауда жастар ұйымдастырған кортеж тұрғындардың мазасын қашырған (видео)

Ақтауда бірнеше көлікті тізгіндеген жастардың ережеге қайшы әрекеті видеоға түсіп қалды әрі қала тұрғындарының ашуын келтірген. Тәртіп бұзушылар жазаға тартылды, деп хабарлайды Маңғыстау облысының полиция департаментіне сілтеме жасаған KAZ.NUR.KZ.

Жастардың көше бойындағы түнгі сейілінің видеосы Instagram-дағы na_dorogah_aktau парақшасында жарияланған.

Кадрда бірнеше көліктің екі қатар болып бара жатқанын көруге болады. Кортеж жолды жауып тастағандықтан, басқа көлік жүргізушілеріне кедергі келтірген. Бұған қоса жастар көліктен кеудесін шығарып алып айғайлаған.

Бұл видеоға тәртіп сақшылары пікір білдірді. Маңғыстау облысының полиция департаменті NUR.KZ тілшісіне тәртіп бұзушылардың жазаланғанын хабарлады.

"Құқықбұзушылық жасаған 12 көлік иесі анықталды.

Оларға қатысты Әкімшілік құқықбұзушылық кодекстің 437, 593, 606, 614, 615-баптары бойынша бірқатар әкімшілік хаттама толтырылды", - деп хабарлады облыстық полиция департаментінің баспасөз қызметі.