Абылай Мырзахметовке қатысты сот үкімі шықты
Жарияланған күні:
![Абылай Мырзахметов Абылай Мырзахметов](https://cdn.nur.kz/images/1120x630/67ef4cb388a71968.jpeg)
Бүгін, 13 мамырда "Атамекен" Ұлттық Кәсіпкерлер палатасы басқармасының бұрынғы төрағасы Абылай Мырзахметовке қатысты үкім шығарылды, деп хабарлайды Астана соттарына сілтеме жасаған KAZ.NUR.KZ.
Астана қаласының қылмыстық істер жөніндегі мамандандырылған ауданаралық сотында аса ірі мөлшерде алаяқтық жасағаны үшін Мырзахметовке қатысты қылмыстық іс қаралды (Қылмыстық кодекстің 190-бабы 4-бөлігінің 2) тармағы).
"Сотта Мырзахметов 2022 жылғы мамыр айынан қазанға дейін Б.-ға ақшалай сыйақы үшін мемлекеттік және құқық қорғау органдарының жоғары лауазымды тұлғалары арқылы ағасы Б.-ны қамаудан босату және оған қатысты сотқа дейінгі іс жүргізуді тоқтату мәселесін шешуге мүмкіндігінің бар екендігін айта отырып, жаңылыстырып, алдау және сенімді теріс пайдалану арқылы, алаяқтық жасау жолымен формалды түрде қарыз шарттарын ресімдей отырып, Б.-ның аса ірі мөлшерде 13,9 млрд теңге сомасында ақшалай қаражатын жымқырғаны анықталды", - делінген хабарда.
Прокурор айыптауды қолдады. Сотталушы кінәсін мойындап, әділ жаза тағайындауды, қорғаушылар іс бойынша іс жүргізуді тоқтатуды сұрады.
Қылмыстық кодекстің 190-бабы 4-бөлігінің 2) тармағының санкциясы 5 жылдан 10 жылға дейінгі мерзімге бас бостандығынан айыру түріндегі негізгі жазаны көздейді.
Сот сотталушының кінәсін мойындауын, шын жүректен өкінуін, өзі жасаған қылмысты тергеуге және қылмыс жасау нәтижесінде алынған мүлікті іздестіруге жәрдемдесуін, кәмелетке толмаған баласының болуын жауапкершілік пен жазаны жеңілдететін мән-жайлар ретінде таныды.
Қылмыстық жауаптылық пен жазаны ауырлататын мән-жайлар анықталған жоқ.
Мырзахметовтің кінәсі сотталушының өз кінәсін мойындауымен, куәлардың айғақтарымен, қарыз шарттарымен және қылмыстық істің басқа да материалдарымен дәлелденді.
Сот үкімімен Абылай Мырзахметов аса ірі мөлшерде алаяқтық жасағаны үшін кінәлі деп танылып, жергілікті өзін-өзі басқару органдарында және квазимемлекеттік сектор субъектілерінде 10 жыл мерзімге қызмет атқару құқығынан айырыла отырып, мемлекет кірісіне қылмыстық жолмен алынған 5,8 млрд теңге сомасында ақша қаражаты тәркіленіп, 5 жылға бас бостандығынан айырылды.
Сот Қылмыстық кодекстің 49-бабының 2-бөлігі негізінде ҚР президентіне Мырзахметовті "Құрмет" және 3-дәрежелі "Барыс" ордені мемлекеттік наградаларынан айыру туралы ұсыныс енгізді. Мырзахметовтің мүлкіне салынған тыйым сақталды.
Сот үкімі заңды күшіне енген жоқ.
Мақаланың түпнұсқасы: https://kaz.nur.kz/society/2099891-abylai-myrzahmetovke-qatysty-sot-ukimi-shyqty/