Вайнер Мейіржан Төребаев неліктен босатылды: ҚАЖД түсініктеме берді

Вайнер Мейіржан Төребаевтың неліктен бостандыққа шыққанын жазасын өтеп жатқан Павлодар облысының ҚАЖД түсіндірді. Бұл туралы KAZ.NUR.KZ хабарлайды.

ҚАЖД сотталушының жазасын ең төменгі қауіпсіздік мекемесінде өтеп жатқанын хабарлады.

"Қылмыстық-атқару заңнамасына сәйкес қауіпсіздігі ең төмен мекемелерде жазасын өтеушілер жұбайының (зайыбының), жақын туысының қайтыс болуына немесе науқастың өміріне қауіп төндіретін ауыр науқасқа, отбасына елеулі материалдық залал келтірген дүлей зілзалаға байланысты екі жаққа (бес тәуліктен аспайтын) жол жүруге қажетті уақытты есептемегенде, жеті тәуліктен аспайтын мерзімге оның шегінен тыс шығуға мекеме әкімшілігінен сұрануға құқылы", - делінген ведомство хабарламасында.

Олар Төребаевқа анасының сырқатына байланысты қысқамерзімді еңбек демалысы берілгенін айтты.

Айта кетейік, бұған дейін Төребаевтың әйелі Мейіржанның үйге аз күндік демалысқа келгенін айтып, онымен бірге түсірілген видео жариялаған болатын.

Еске салайық, 2022 жылғы ақпанында блогер Мейіржан Төребаев пен актер Мейірхан Шерниязов Mudarabah Capital қаржы пирамидасын құрды деген күдікке ілінген болатын. Кейін олар қамауға алынды.

Бірінші сот отырысы 2022 жылғы желтоқсанында өтті. Шерниязовтың адвокаты оның қорғауындағы азаматтың өзі 36 миллион теңге қосқандықтан, жәбірленушілер қатарынан шығарылғанын айтты.

2023 жылғы 23 маусымда сот үкімі шықты. Вайнерлер ең төменгі қауіпсіздік мекемесінде 5 жылға бас бостандығынан айырылды. Апелляциялық сот алқасы бірінші сатыдағы соттың үкімін өзгеріссіз қалдырды. Кейінірек вайнерлер Мейіржан Төребаев пен Мейірхан Шерниязовтың қай жерде жазасын өтеп жатқаны белгілі болды.