Алматы облысында жеткізуші балаларды қолдау орталығына нанды 354 теңгеден сатқан

Алматы облысының Қиын өмір жағдайындағы балаларды қолдау орталығында ӘМАТ-ты жоғары бағамен сатып алу дерегі анықталды. Бұл туралы Қаржылық мониторинг агенттігі Telegram-дағы ресми арнасында хабарлады.

Ведомство ақпараты бойынша, қазіргі таңда орталықта 120-дан астам кәмелетке толмаған бала тәрбиеленіп отыр. Жеткізуші нанды 140 теңгеден сатып алып, оны балалар үйіне 354 теңгеден (153 пайыз үстемақымен) жеткізген.

"Ол қарақұмық жармасын – 145 пайыз (281 тг/кг алып, 687 тг/кг сатқан), күнбағыс майын - 63 пайыз (600 тг/л алып, 977 тг/л сатқан), қантты – 38 пайыз (350 тг/кг алып, 480 тг/кг сатқан) үстемақымен жеткізген", - делінген хабарламада.

Сондай-ақ агенттік мәліметіне сүйенсек, қолданыстағы заңнамаға сәйкес, Әлеуметтік маңызы бар азық-түлік тауарларға шекті сауда үстемесінің мөлшері 15 пайыздан аспауға тиіс.

Жеткізуші әкімшілік жауапкершілікке тартылды, ал орталықпен жасалған ӘМАТ-ты жеткізу шарты 1,3 млн теңгеге төмендету жолымен қайта қаралды.

Сонымен қатар агенттік қабылдаған шешім нәтижесінде өңірдің бірқатар балабақшасы жеткізушілермен сатып алу бағасын 3,9 млн теңгеге төмендете отырып, қосымша келісімдер жасасты.