Дәрігердің қабылдауына "жазып", несие рәсімдейді: Қазақстанда алаяқтықтың жаңа түрі пайда болды

Алаяқтар қазақстандықтарға телефон соғып, медициналық тексеруден өтуді ұсынады. Оларды дәрігердің қабылдауына жазған болып, жәбірленушіден SMS кодын сұрайды. Бұл кодпен алаяқтар несие алуға өтініш бере алады, деп хабарлайды KAZ.NUR.KZ.

Дәрігерлер қазақстандықтарға жылына бір рет флюорографиядан өтуге кеңес береді. Бұл әдіс көптеген денсаулықтағы проблемаларды ерте кезеңде анықтауға мүмкіндік береді.

Денсаулықты күтудің маңыздылығы алаяқтардың да есіне түсті. Соның салдарынан қазақстандықтарға "медицина қызметкерлері" қоңырау шалып немесе мессенджерлерде хабарламалар ала бастады.

Әңгімелесу барысында "дәрігерлер" құрбандарын "диспансерлік тексеруге немесе жоспарлы флюорографияға" шақырады. Ал қолайлы күнді таңдағаннан кейін олар әңгімелесушілерден SMS-код арқылы жазылғандарын растауды сұрайды.

ҚР Ішкі істер министрлігінің (ҚР ІІМ) Polisia.kz ресми Telegram-арнасында айтылғандай, мұндайда кодты хабарлауға тыйым салынады. Шын мәнінде, қоңыраулар мен хабарламалар дәрігерлерден емес, алаяқтардан келеді.

"Ешбір жағдайда кодты айтпаңыздар. Оны пайдалана отырып, алаяқтар жеке шотыңызға қашықтан кіріп, жеке деректеріңізді ұрлап алады да, несие рәсімдейді. Бұл туралы жақындарыңызға, әсіресе қарт адамдарға айтуды ұмытпаңыздар", - деп хабарлайды ҚР ІІМ өкілдері.

Естеріңізге сала кетейік, алаяқтар өздерін дәрігер ғана емес, полиция қызметкерлері мен банк қызметкерлері ретінде де көрсетеді.