Шымкентте бас есепші 7,5 жылға бас бостандығынан айырылды

Шымкент қаласының қылмыстық істер жөніндегі ауданаралық соты Дене шынықтыру және спорт басқармасы емханасының бас есепшісіне қатысты қылмыстық істі қарады. Бұл туралы KAZ.NUR.KZ Жоғары сотқа сілтеме жасап хабарлайды.

Тергеу органы ол қызмет бабын пайдалана отырып, аса ірі мөлшерде бөтеннің сеніп тапсырылған мүлкін иеленді (Қылмыстық кодекстің 189-бабының 4-бөлігінің 2-тармағы бойынша) деп айыптады.

Сот емхананың бас есепшісі бір жыл бойы қызметкерлердің шотына жалақысынан асып түсетін қаражатты есептеп отырған. Содан кейін ол осы артық жинақталған қаражатты досының банк картасына қайтаруды сұраған. Осылайша, бұл ақшаны өзі иемденіп, өз қажеттіліктеріне жаратқаны анықталды.

Сотталушының әрекетінен мемлекетке 29 миллион теңгеден астам шығын келтірілген.

Прокурор 7,5 жылға бас бостандығынан айыру жазасын тағайындауды сұрады.

Сотталушы өз кінәсін ішінара мойындап, соттан бас бостандығынан айырумен байланысты емес жаза тағайындауды сұрады.

Соттың шешімі сотталушы Қылмыстық Кодекстің 189-бабының 4-бөлігінің 2-тармағы бойынша кінәлі деп танылды. Оны мемлекеттік қызметте лауазымдарды атқару құқығынан өмір бойына айыра отырып, 7,5 жылға бас бостандығынан айыру жазасы тағайындалды.

Үкім заңды күшіне енген жоқ.