"Директорды бопсалап, ақша талап еткен": Түркістан облысында екі блогер қамауға алынды

Түркістан облысында бопсалау арқылы ақша талап ету фактісі бойынша екі адам ұсталды. Бұл туралы облыстық прокуратураға сілтеме жасаған KAZ.NUR.KZ хабарлайды.

"Сайрам ауданы прокуратурасының үйлестіруімен полиция қызметкерлері жүргізген жедел іс-шаралар нәтижесінде бопсалау арқылы ақша талап ету фактісі бойынша екі адам ұсталды.

Атап айтқанда А. және Е. есімді белсенді блогерлер аудандағы бір мектеп директорынан Facebook әлеуметтік желісінде іскерлік беделіне нұқсан келтіретін жарияланымын жою үшін 100 мың теңге талап еткен", - делінген прокуратура хабарламасында.

Қадағалаушы орган өкілдері осы факт бойынша Қылмыстық кодекстің 194-бабы 2-бөлігімен сотқа дейінгі тергеп-тексеру басталғанын хабарлады.

Күдіктілер 2 айға қамауға алынған.