Жетісу облысында бахиланы миллион теңгеге сатпақ болғандар анықталды

Кәсіпкер медициналық-білім беру мекемесіне бахила жеткізу бойынша жарияланған конкурста жеңіске жеткен. Алайда тауардың бағасы нарықтық құнынан 60 есе қымбат көрсетілген. Бұл жөнінде Жетісу облыстық прокуратурасына сілтеме жасаған KAZ.NUR.KZ хабарлайды.

Прокурорлар нарықтық құнынан 60 есеге көп сомада бахила сатып алуға жол бермеді.

"Сатып алуды Абай облысының медициналық-білім беру мекемесі іске асырды, онда 500 қорап (25 мың жұп) көлемінде бахила жеткізуге 887 500 теңге болатын ең аз соманы ұсынған кәсіпкер жеңіске жетті.

Соңғысы 500 дананы (250 жұп), яғни әрқайсысын 1775 теңгеден жеткізбек болған", - деп мәлімдеді прокурорлар.

Қадағалаушы орган өкілдерінің мәліметінше, Жетісу облысының мамандандырылған ауданаралық экономикалық сотының шешімімен кәсіпкердің талаптары қолдау тауып, сот мекемені ақшалай қаражат төлей отырып, тауарды қабылдауға міндеттеді.

"Ал апелляциялық сатыдағы прокурорлық ден қою шаралары ғана бахиланың нарықтық құны 30 теңгеден аспайтыны дәлелденіп, заңсыз шешімнің күші жойылды", - дейді прокурорлар.