Павлодар облысында жағажайда демалушылар әкімшілік жауапқа тартылды (видео)

Павлодар облысындағы жағажайларда рейд жүргізілді. Суда қауіпсіздік ережелерін сақтамаған демалушыларға айыппұл салынды, деп хабарлайды KAZ.NUR.KZ облыстық Төтенше жағдайлар департаментінің баспасөз қызметіне сілтеме жасап.

Павлодар облысы ТЖД-ның Instagram-дағы ресми парақшасында жарияланған ақпаратқа сәйкес, Төтенше жағдайлар департаменті, полиция қызметкерлері, білім басқармасының өкілдері және еріктілер суда рейдтік іс-шаралар өткізген.

"Демалушылармен профилактикалық әңгімелер өткізілді, жазғы демалыс кезінде қауіпсіздік ережелері түсіндірілді, жадынамалар табысталды", - делінген хабарламада.

Су айдындарындағы қауіпсіздік ережелерін бұзу дерегі бойынша заң бұзушыларға қатысты әкімшілік шаралар қабылданды: ӘҚБтК412-бабы (Су айдындарындағы қауіпсіздік ережелерін бұзу немесе орындамау) бойынша 3 әкімшілік хаттама толтырылып, әкімшілік айыппұл салынды. Айыппұлдың жалпы сомасы – 38 766 теңге.