Киевте журналист Садықовқа қастандық жасады деген екі күдіктіге Украинада іздеу жарияланды

Киевте қазақстандық журналист Айдос Садықовты өлтірмек болды деген күдіктілерге халықаралық іздеу жарияланды. Бұл туралы KAZ.NUR.KZ Украина Бас прокуратурасына сілтеме жасап хабарлайды.

Украина Бас прокуратурасының Telegram-дағы ресми арнасында хабарланғандай, екі қазақстандық журналист Айдос Садықовты өлтірмек болды деген күдікке ілінген. Оларға халықаралық іздеу жарияланды.

Екеуі де адамдар тобының тапсырысы және алдын ала сөз байласуы бойынша қасақана кісі өлтіруге оқталды деп күдікке ілінді.

Садықовқа қастандық 18 маусымда Киевтің Шевченков ауданында, жәбірленуші әйелімен бірге тұратын үйден алыс емес жерде болған. Жәбірленушінің Украинада босқын мәртебесі бар.

"Бұған дейін екі ер адамның Украинада босқын мәртебесі бар журналисті өлтіру бойынша әрекетті мұқият жоспарлағаны анықталды.

Күдіктілер Украина аумағына 2 маусымда Польша-Украина шекарасынан өтіп келген. Киевте олар пәтер жалдап, көлік сатып алған. Олар жәбірленушіні біраз уақыт зерттеп бақылаған.

Қылмыс жасалған күні, яғни 18 маусымда күдіктілердің бірі жәбірленушінің көлігіне жақындап, оқ атқан, ал оның сыбайласы үй маңындағы жағдайды бақылаған. Кейін олар оқиға орнынан кетіп қалған.

Күдіктілер қасақана кісі өлтіруге оқталған күні Украина аумағынан шығып, Украина мен Молдова шекарасын кесіп өткен", - деп хабарлады Украина мемлекеттік полициясы.

Киевтің Голосеев аудандық соты сырттай бұлтартпау шарасы бойынша қамауға алуды тағайындады. Тергеу жалғасып жатыр.

Киевте журналист Айдос Садықовқа жасалған шабуыл

Айта кетейік, бұған дейін қазақстандық БАҚ 18 маусымда Киевте тұратын қазақстандық белсенді, "Бәсе" YouTube-арнасының авторы Айдос Садықовты белгісіз біреу атып кеткенін жазған еді.

Бас прокуратура Садықовтың "ауруханада жатқанын, жағдайы ауыр екенін" хабарлады.

Украина Бас прокуратурасының мәліметінше, жәбірленуші мен оның жұбайы 2014 жылдан бері Украинада тұрады және босқын мәртебесін алған.

19 маусымда мемлекет басшысы Қасым-Жомарт Тоқаев Киевте Қазақстан журналисіне жасалған қастандық әрекетке пікір білдіріп, Қазақстанның ресми органдары істің ақиқатына жетуге жәрдем беру үшін тергеу жұмысына қатысуға дайын екенін жеткізді.

Кейін Ішкі істер министрлігі журналиске қастандық жасады деген күдіктілерге қатысты ақпарат берді.

Сонымен қатар президенттің баспасөз хатшысы Қасым-Жомарт Тоқаев Киевте Қазақстан азаматы Айдос Садықовқа жасалған шабуылды тергеу барысын жіті бақылап отырғанын хабарлады.

Мемлекет басшысының тапсырмасы бойынша 18 маусымда Киевте болған Айдос Садықовты өлтіруге қастандық жасау дерегі бойынша Бас прокуратура сотқа дейінгі тергеуді бастады.