Шенеуніктер мен әскерилердің ойын мекемесіне баруына тыйым салу: ведомство петиция бойынша шешім шығарды

Туризм және спорт министрлігі мемлекеттік қызметкерлер мен құқық қорғау органдарының қызметкерлеріне құмар ойындарға тыйым салу туралы петицияны қолдады. Бұл туралы KAZ.NUR.KZ ведомство сайтына сілтеме жасап хабарлайды.

Министрлік шенеуніктердің құмар ойындарға қатысуына тыйым салу туралы петицияны қарау туралы шешімді жариялады. 24-25 маусымда жұмыс тобының отырыстары өткені хабарланды.

"Бірінші отырыстың қорытындысы бойынша барлық айтылған пікірді ескере отырып, шешім жобасы әзірленді. Отырыс барысында мемлекеттік қызметшілер мен әскери қызметкерлердің құмар ойындар мен бәс тігуге қатысуын бақылау тетігі талқыланды. Айта кету керек, жұмыс тобы мүшелерінің басым көпшілігі петицияны қолдады. Букмекерлік кеңселер мен казино қауымдастығының екі өкілі ғана қарсы болды", - делінген хабарламада.

Министрлік петицияға қатысты 2 мыңнан астам пікірге талдау жүргізді. Пікір иелерінің басым көпшілігі петицияны және мемлекеттік органдар мен әскери қызметкерлердің құмар ойындарға қатысуын шектеуді қолдайды. Сонымен қатар бірнеше пікір білдірушілер мұндай шектеуді енгізуге ешқандай себепсіз қарсы екендігін білдірді.

Сондай-ақ жұмыс тобына қатысушылар халықаралық тәжірибені сараптап, шет елдерде мемлекеттік қызметкерлердің құмар ойындарға қатысуына тыйым салу жиі кездесетінін анықтады.

Осыған байланысты мемлекеттік қызметшілерге, әскери қызметшілерге, сондай-ақ құқық қорғау және арнайы органдардың қызметкерлеріне тыйым салуды енгізу ұлттық заңнамаға өзгерістер енгізуді талап етеді.

"Мұндай шара екі себеп бойынша енгізіледі. Біріншіден, мемлекеттік құрылымдар өкілдерінің құмар ойындарына қатысуы биліктің имиджіне теріс әсер етеді және маңызды мемлекеттік шешім қабылдаушыларға психикалық тәуелділіктің дамуына әкелуі мүмкін. Екіншіден, құмар ойындарға қатысу шенеунікті пара алуға және манипуляция жасауға итермелейді. Тәжірибе көрсеткендей, құмар ойындарына әуес және бәс тігетіндер көбіне мемлекеттік қызметкерлер мен әскери қызметкерлерді сыбайлас жемқорлық қылмыстарын жасауға итермелейді.

Жоғарыда айтылғандардың негізінде министрлік жұмыс тобының бірауыздан ұсынысын ескере отырып, петицияны қолдайды және оны толық көлемде қанағаттандыру қажет деп санайды", - дейді министрлік өкілдері.