"Негізі толық сақталған": Қазақстанның батысынан Алтын Орда дәуірінен қалған ерекше нысан табылды (видео)

Халел Досмұхамедов атындағы Атырау университетінің студенттері археологиялық қазба кезінде көне кесененің дромосын тапты. Ғалымдар бұндай нысан бұрынғы зерттеулерде кездеспегенін айтады. Бұл туралы KAZ.NUR.KZ Ғылым және жоғары білім министрлігіне сілтем жасап хабарлайды.

Биыл тарихшы-зерттеуші мамандығының студенттері "Сарайшық" музей-қорығындағы археологиялық қазба жұмыстарына барып қатысқан.

ХV-XVI ғасырға тән нысан күйдірліген кірпіштен берік әрі сәнді қаланған. Алайда, кесененің күмбезі қирағанымен жабық дәлізі сол қалпында сақталған.

"Бұндай түрде салынған кесенелер Сарайшық қаласында бұрында анықталған, бірақ олар қатты бүлінген еді. Бұл кесененің ерекшелігі – дромосы толық сақталуында. Әзірге алдын-ала болжам бойынша белгілі, қоғамдағы статусы жоғары адамдар жерленген болуы мүмкін", - дейді археолог Амангелді Заинов.

Археологтың сөзінше, есігі оңтүстік шығысқа қараған кесене дромосының ұзындығы 170, биікті 60 сантиметр, бұл – дәліздің жартылай қазылған бөлігі.

Археологтар қазба жұмысын үш бөлікке бөліп жүргізген. Бірінен дәлізге жалғасқан көлемді қабірдің қабырғалары табылды және оның ұзындығы 6, биіктігі 1 метр, қалыңдығы 55 сантиметр.

"Бұл кесенені салуға сары және қызыл кірпіштер пайдаланылған. Сары кірпіштер – Алтын орда дәуірінің ескі кірпіштері, ал қызыл кірпіштер – құрылыс салынарда күйдіріліп жасалғаны анық. Бұл – Сарайшықтағы ең сирек кездесетін нысан", - дейді археологиялық қазбаға қатысқан студент Ерасыл Өмірбек.

Дромостың оңтүстік бөлігінен шаруашылық бөлме де анықталған. Ондағы қазба кезінде қыш құмыралар мен түрлі бұйымдар және орта ғасырлық сәндік жапсырмалар, мыс тиындар табылған. Археолгиялық нысан алдағы уақытта терең зерттелемек.

Орта ғасырлық қалада студенттердің оқу-практикасын жүрзігіп тың деректерді табуы Х.Досмұхамедов атындағы Атырау университеті мен "Сарайшық"музей-қорығы арасындағы екі жақты келісім негізінде жүзее асқан. Практика кезінде белсенді жұмыс істеп тарихи кесенені қазуға атсалысықан 19 студентті музей-қорық басшылығы алғыс хаттармен марапаттады.