Алматы әуежайының жаңа терминалын тағы да су басты (видео)
Жарияланған күні:
Алматы әуежайындағы жаңа терминалды тағы да су басты. Әуежайдың баспасөз қызметі қолайсыздықтар жақын арада жойылатынын хабарлады, деп жазады KAZ.NUR.KZ.
Telegram-дағы "Qumash" арнасында Алматы әуежайында түсірілген видео жарияланды. Бейнежазбада жаңа терминалды су басып жатқанын көруге болады.
Алматы әуежайының баспасөз қызметі KAZ.NUR.KZ тілшісіне пікір білдіріп, су басудың себебін түсіндірді. Әуежай өкілдері қатты жауын-шашынның салдарынан перрон жақтағы нөсер канализациясының жүйесі жартылай толып қалғанын айтты.
"Бұрынғы және жаңа терминал арасында су жиналып, халықаралық рейстер залын басты. Туындаған мәселені жою үшін әуежайдың барлық қызметі тартылды. Қазіргі уақытта техникалық қызмет нөсер канализациясын тазалау жұмыстарын іске асыруда. Халықаралық рейстердің ұшу алаңында жұмыс штаттық режимде жүріп жатыр.
Ұшып келіп жатқан рейстерге уақытылы қызмет көрсету бойынша тиісті шаралар қабылданып жатыр. Су басудың салдары жақын арада жойылады. Жолаушылар мен ұжымның қауіпсіздігін сақтау - біздің басты мақсатымыз. Қолайсыздықтар үшін кешірім сұраймыз", - делінген ресми хабарламада.
Мақаланың түпнұсқасы: https://kaz.nur.kz/society/2135109-almaty-auezhaiynyng-zhanga-terminalyn-tagy-da-su-basty-video/
