eGov.kz өкілдері азаматтарға 1414-тен келетін хабарламаларға қатысты ескерту жасады

Электрондық үкімет порталының өкілдері алаяқтық әрекеттерге байланысты қазақстандықтарға үндеу жасады. Бұл туралы Instagram-дағы eGov.kz парақшасында хабарланды.

"Құрметті пайдаланушылар! Алаяқтардың құрбаны болмас үшін 1414-тен кодтары бар хабарламаларды үшінші тұлғаларға жібермеңіз. Алаяқтар хабарламадағы кодты пайдаланып, сіздің цифрлық деректеріңізге қол жеткізе алады", - делінген хабарда.

Осы орайда электрондық үкімет өкілдері үшінші тұлғаларға ЭЦҚ бермеу қажет екенін ескертті.

"ЭЦҚ-ны үшінші тұлғаларға бере отырып, сіз оларға заңды қол қою мүмкіндігін бересіз және оның салдары үшін жауап бересіз", - делінген хабарда.

Деректерді қалай қорғауға болады

• 1414-тен жіберілген sms-кодты үшінші тұлғаларға бермеңіз;
• ЭЦҚ үшінші тұлғаларға бермеңіз;
• қызметкерлер жұмыстан босатылғаннан кейін ЭЦҚ кері қайтаруын қадағалаңыз;ресми
• құжаттарға қол қоюға жауапты қызметкерлерге жеке ЭЦҚ беріңіз;
• ЭЦҚ бар флешка жоғалған жағдайда бірден жаңа ЭЦҚ алыңыз;
• ХҚКО алынған ЭЦҚ құпиясөзін ауыстырыңыз;
• бейтаныс адамдардан ЭЦҚ кілтін ашу үшін ақылы көмекке жүгінбеңіз.

ЭЦҚ туралы Заңының 10 бабының 2-тармағына сәйкес ЭЦҚ жабық кілттерін басқа адамдарға беруге болмайды. Кодекстің 640-бабының 5-тармағына сәйкес ЭЦҚ-ның жабық кілтін басқа тұлғаларға заңсыз бергені жеке тұлғалар үшін 10 АЕК, ал заңды тұлғалар үшін 15 АЕК мөлшерінде айыппұл салынады.