"Ештеңе түсінбейтін ақымақтар": Гүлмира Сатыбалды сотына қатысушылар сотта айғайлап, бірін-бірі балағаттады

Бүгін, 18 шілдеде Гүлмира Сатыбалдаға қатысты өткен сотта тараптар айғайласып, бірін-бірі балағаттаған. Жағдай бақылаудан шыққан соң, судья процесті тоқтатқан, деп жазады KAZ.NUR.KZ.

Бүгін сотта куә Игорь Родионовтан жауап алынды. Ол Қайрат Сатыбалдының қол астында жүргізуші болып жұмыс істеп, 2019 жылғы маусым айында "Ария Жаңа Астана" ЖШС құрылтайшысы болды. Оның айғақтары жәбірленуші Абай Жүнісовтің наразылығын тудырды, ол куәгер "шынайы емес, өтірік айтып отыр" деп бірнеше рет айтқан. Осыдан кейін жәбірленуші өз ұстанымын түсіндіре отырып, дауысын көтеріп, үстелді ұрып, эмоциямен сөз бастады.

"Компанияда бірдеңе болған кезде, олар мені тұрғызып алып "Ол кінәлі" дейтін. Мен шаршадым, бұлар ештеңе түсінбейтін ақымақтар. Ақымақ адамдар келді, олар шексіз былық жасай береді. Айтылмаған нәрсе көп. Бұл адамдар бизнесті нөлден бастаудың не екенін білмейді, олар тек тартып алуға үйренген", - деді жәбірленуші.

Абай Жүнісов тұтқында болғанда мүлкі Сатыбалдының сенімді өкілдеріне өтіп кеткен кез туралы айтты. Сол кезеңде Игорь Родионов компанияның құрылтайшысы болған. Сонымен қатар жәбірленуші куәгердің компанияны басқарудағы білімі мен дағдыларына күмән келтірді. Жәбірленуші Родионовтың бұрын тек жүргізуші болып жұмыс істегенін айтты.

"Ең бірінші ол қалтасын толтырды. Сыйлық ретінде төрт бөлмелі пәтер алды. Егер компанияға көмектескің келсе, Гүлмираны аясаң, басқаша әрекет етіп, көмектесуің керек еді, пәтер алмай. Енді бәрін маған жаба салмақшы, ақымақтар", - деді жәбірленуші айғайлап.

Осы кезде Гүлмира Сатыбалды орнынан тұрып: "Сабыр сақта" деді. Мұны сот процесінде отырған басқа қатысушылар да сұрады.

"Мен мұның бәрінен шаршадым. Алты жыл болды. Бұлардың жүзін көргім келмейді", - дейді Жүнісов.

Содан кейін Абай Жүнісов екінші айыпталушы Мәди Батыршаевты балағаттап: "Неге жетісіп, күлесің, сенің кесіріңнен анамнан айырылдым, жексұрын", - деді.

Осы кезде процеске қатысушылардың барлығы дерлік айқайласып, орындарынан тұрып, тіпті судьяның өтініштері де естілмей қалған.

Судья күзетшілерден айыпталушыларды сот залынан шығаруды сұрады. Батыршаев сот залынан шыққан кезде жәбірленушіні тағы да балағаттап, оған Абай Жүнісов солай жауап қатқан.

Судья процесті тоқтатып, келесі сот отырысында шешімді жариялайтынын айтты.