Қазақстан NVIDIA-мен келісімге келді

NVIDIA Қазақстанның оқу орындарында жасанды интеллект бойынша білім беру бағдарламаларын іске қосады. Бұл туралы Цифрлық даму министрлігінің Telegram-дағы арнасына сілтеме жасаған KAZ.NUR.KZ хабарлайды.

Цифрлық даму министрлігінің делегациясы Сан-Франциско қаласында NVIDIA компаниясының бас кеңсесінде болды. Сапар барысында компанияның барлық өнімдері, соның ішінде олардың соңғы революциялық Blackwell чипі ұсынылды. Сонымен қатар жасанды интеллект пен суперкомпьютерлік технологиялар саласындағы ынтымақтастық перспективалары талқыланды.

"NVIDIA-мен жүргізілген келіссөздер нәтижесінде Deep Learning Institute бағдарламасы аясында Қазақстанның оқу орындарында жасанды интеллект бойынша білім беру бағдарламаларын іске қосу туралы келісімге қол жеткізілді. Сондай-ақ білім беру мазмұнын қазақ тіліне локализациялау жүргізіледі", - делінген министрлік хабарламасында.

Айта кеткен жөн, министрлік Қазақстанда жасанды интеллектті дамыту үшін NVIDIA чиптерін пайдалана отырып, есептеу қуатын құру бойынша белсенді жұмыс жүргізуде.

Цифрлық даму министрлігінің мәліметінше, NVIDIA (NVIDIA Corporation) — америкалық технологиялық компания, чиптегі графикалық процессорлар мен жүйелерді (SoC) жасаушы. Nvidia нарықтық капитализациясы 3 трлн долларға жеткен алғашқы компьютерлік Чип компаниясы. Бұл көрсеткіш бойынша компания Apple-ді басып озды және Microsoft корпорациясынан кейінгі екінші орында. Компанияда қызметкерлердің шамамен 30 пайызы 20 миллион долларға жетті.