Түркістан облысында қылмыс деңгейі төмендеп келеді

Түркістан облысы полиция департаментінің басшысы Мұрат Қабденов аппарат пен облысқа қарасты аудандық, қалалық полиция басшыларының жұмысын пысықтап, облыста қылмыс деңгейі төмендегенін анықтады. Бұл туралы Polisia.kz хабарлайды.

Жедел кеңесте 2024 жылдың 6 айында тәртіп сақшыларымен атқарылған жұмыстың нәтижелері қаралды. Департамент бастығының орынбасарлары өздеріне бекітілген құрылым бойынша баяндамалар жасап, есеп берді.

Статистикаға сүйенер болсақ, Түркістан облысында осы жылдың 6 айында 2551 қылмыстық құқық бұзушылық тіркеліп, өткен жылдың есептік мерзімімен салыстырғанда 2,3 пайызға төмендеді. Оның ішінде қылмыс саны 7,9 пайызға азайған.

Жалпы, ұрлық қылмысының тіркелімі 516-дан 330-ға азайған. Пәтер ұрлығы қылмысының тіркелімі 47,5 пайызға азайған. Мал ұрлығының тіркелімі 95-тен 50-ге төмендеді. Тонау қылмысы 31 пайызға төмендесе, бұзақылық қылмысы 26,4 пайызға қысқарды.

Жиын соңында Мұрат Қабденов жеке құрамға балалар қауіпсіздігі, алаяқтық қылмысы мен жол көлік оқиғаларының алдын алу шараларын күшейтуді тапсырды. Сондай-ақ 15 бағыт бойынша нұсқаулар беріп, жыл соңына дейін оң нәтижеге жетуге бағыттады. Қоғамдық қауіпсіздікті қамтамасыз ету, тұрғындар тыныштығын сақтауда жұмысты жандандыруға шақырды.