Қазақстандық азамат Швециядан есірткі жеткізуді ұйымдастырғаны үшін 18 жылға сотталды

Ірі көлемде гашиш жеткізу ісі бойынша Астана тұрғыны 18 жылға бас бостандығынан айырылды. Бұл туралы Бас көлік прокуратурасының сайтына сілтеме жасаған KAZ.NUR.KZ хабарлайды.

Бас көлік прокуратурасының сайтындағы мәліметке сәйкес, биыл 25 шілдеде Астана қаласының мамандандырылған ауданаралық қылмыстық істер жөніндегі соты халықаралық есірткі тасымалдау схемасына қатысы бар азаматқа қатысты үкім шығарды.

"Сотталушы Швециядан 479 грамм аса ірі көлемде гашиш жеткізуді ұйымдастырып, оны құжаттар қорабына жасырды. Есірткі бетбелгі жүйесі арқылы есірткіге тәуелді адамдар арасында одан әрі сақтауға және таратуға арналған.  

Сотта мемлекеттік айыптаушы кінәні дәлелдейтін айғақтарды келтірді. Құқық қорғау органдарының жедел әрекеттерінің арқасында 500 дозадан астам есірткінің таралуын болдырмауға мүмкіндік туды", - делінген хабарламада. 

Сот процесі сотталушыны бірауыздан кінәлі деп таныған алқабилердің қатысуымен өтті. Сот оны 18 жылға бас бостандығынан айырды.

Үкім заңды күшіне енген жоқ.