Кәрім Мәсімовтің бұрынғы күйеу баласына іздеу жарияланды

Кәрім Мәсімовтың бұрынғы күйеу баласына іздеу жарияланды. Іздеу туралы ақпарат құқықтық статистика органдарының порталында пайда болды, деп хабарлайды KAZ.NUR.KZ тілшісі.

Құқықтық статистика органдары порталының "Қылмыскерлерді іздеу" бөліміндегі ақпаратта 1978 жылы туған Азамат Абайұлы Қапеновті іздестіру жұмыстары туралы айтылады.

Іздеу карточкасындағы мәлімет бойынша Азамат Абайұлы Қапеновті іздеу 2024 жылғы 9 тамызда Шығыс Қазақстан облысында тіркелген.

Іздеу жүргізетін орган – Қазақстан Республикасы Сыбайлас жемқорлыққа қарсы іс-қимыл агенттігінің Шығыс Қазақстан облысы бойынша департаменті.

Сонымен қатар Kazinform.kz агенттігі Қапенов Мәсімовтің бұрынғы күйеу баласы, оның үлкен қызы Тамилла Кәрімнің күйеуі екенін хабарлады.

Азамат Қапенов – кәсіпкер, "Федералдық жүк тасымалдау компаниясы" АҚ бас директорының ТМД және көршілес мемлекеттердегі бизнесті дамыту жөніндегі бұрынғы орынбасары, деп хабарлайды басылым.

Толығырақ түсініктеме алу үшін NUR.KZ тілшісі Сыбайлас жемқорлыққа қарсы қызметіне жүгінді. Олар ақпаратты кейінірек беруге уәде берді.